Enkontru preparativu Konsulta Populár, 30 Agostu. Foto: Nelia Fernandes

DILI, 01 agostu 2019 (TATOLI)-Komisaun Organizadora (KO) ne’ebé kompostu husi liña ministeriál sira kontinua enkontru preparativu ba komemorasaun loron Konsulta Populár, 30 Agostu.

“Preparasaun reuniaun ida agora ne’e ba última reuniaun preparasaun ba atividade tomak ne’ebé atu prepara ba selebrasaun 30 de agostu nian,” hateten Vise Koordenadór KO Konsulta Populár Virgílio Smith ba jornalista sira, iha Ministériu Finansas Ai-tarak Laran, (01/08/2019).

Vise KO ne’e informa, kona-ba atividade komemorasaun la’o daudaun ona, hosi munisipiu sira hahú horiseik no ohin; iha Munisípiu Lautem, depois Munisípiu Lautem, aban sei selebra iha Baucau, ba Viqueque, mai iha Manatutu remata iha Oe-cusse.

“Iha 24 ou 25 sei konsentra atividade iha Dili kona-ba atividade ne’ebé parte hosi festivál arte kultura, comidas (hahán) tradisionál, sertame no mós kompetisaun dansa tradisionál,” nia reforsa.

Vise ne’e  informa tan, dia 27 ka 28 ita-nia konvidadu hosi bainaka sira li’ur, sei to’o iha Dili; xefe estadu, xefe governu, Grupu Solidariedade Sosiál, organizasaun Nasaun Unida-UNTAET (United Nation Administration Transition in East Timor), jornalista sira no mós g7+.

Nia hatutan, atividade g7+ nian, sei vizita ba fronteira hodi haree kona-ba ita-nia prosesu rekonsiliasaun ho Indonézia no mós ho timoroan sira ne’ebé hela iha Indonézia.

“Dia 29 sei selebra misa litúrjia, misaun asaun de graças ba ita-nia 20 anos nian, dia 30 iha atividade lubuk ida; primeiru sei halo inaugurasaun ba ponte B.J. Habibie Bidau Santana, sei halo serimónia troka Nota Diplomátika kona-ba Tratadu Fronteira Marítima, komesa 6 horas, sei hahú serimónia iha Tasi Tolu”.

“Iha dia 20 anos sei komemora primeiru komesa hosi Lautem, remata Oe-cusse sei hala’o iha 24 ou 25, depois Oe-cusse sei konsentra hotu iha Dili hodi hala’o atividade sira ne’ebé programadu ona,” informa Vise Koordenadór KO Konsulta Populár, Virgílio Smith.

Vise Komisaun ne’e reforsa, Aeroportu koordena ona ho AMTL (Associação dos Médicos de Timor-Leste) ho sesaun Protokolu Ministériu Negósiu Estranjeiru hodi haree buat ne’ebé mak presiza atu tau iha sala VIP (Very Important Person-Ema Importante Liu) nian.

“Tasi Tolu komesa daudaun ona, hosi lojístika, prepara ona fatin limpeza, buat sira ne’ebé atu tau hanesan palku, kona-ba estrada sei iha hela faze konstrusaun, konfirma ona ho obras públika sei remata iha tempu badak,” garante vise komisaun organizadora ne’e.

Entretantu, tuir planu KO ne’ebé mak iha, iha kinta, 08 agostu 2019 sei realiza enkontru ikus hodi ko’alia kona-ba finansa, iha ámbitu preparativu komemorasaun loron Konsulta Populár

Notísia relevante: http://www.tatoli.tl/2019/07/25/komisaun-organizadora-tinan-20-konsulta-popular-kontinua-atualiza-preparasaun/

Jornalista: Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here