Diretór Jerál Asuntu Konsulár Protokolár, Serimoniál no Mídia, hanesan mós Vise Koordenadór Jerál Protokolu, Juvêncio de Jesus Martins

DILI, 25 jullu 2019 (TATOLI)-Komisaun Organizadora (KO) ne´ebé kompostu husi liña ministeriál sira kontinua halo enkontru preparativu ba komemorasaun loron Konsulta Populár, 30 Agostu.

“Objetivu enkontru ne’e hanesan koordenasaun tanba husi prezidente komisaun organizasaun nian fó orden para semana-semana, organizasaun traballu ba preparativu, sesaun sira to’o iha ne’ebé ona,” hateten Diretór Jerál Asuntu Konsulár Protokolár, Serimoniál no Mídia, hanesan mós Vise Koordenadór Jerál Protokolu, Juvêncio de Jesus Martins, depois ramata enkontru iha Ministériu Finansas Aitarak laran, Dili (25/07/2019).

Vise Koordenadór Jeral Protokolu ne´e haktuir, iha enkontru ne´e diskute kona-ba protokolu, seguransa sívil munisipiu sira hanesan Lospalos, Viqueque, Manatutu, Dili, hare’e ba sira-nia programa. “Parte protokolu nian, haree ami-nia konfirmasaun hira ona, fó ba hothotu rona, hola desizaun atu fó tan prazu ba ita-nia bainaka sira to’o dia 31, hanesan prazu finál, dia 1 sei enkontru fali hodi fó hatene se mak mai no se mak la mai”.

“Figura boot ita konvida barak maibé konfirma ne’e, Prezidente Asembleia Portugal nian, Prezidente Indonézia Jokowi ko’alia maibé seidauk fiksu, Primeiru-ministru Austrália, Prezidente Sahara Osidentál, Primeiru-ministru Cabo Verde mós atu mai, Enviadu Espesiál Sekretáriu ONU, nia halo video ida mai putar (loke) iha ne’e,” nia haktuir.

Diretór Jerál Asuntu Konsulár Protokolár, Serimoniál no Mídia, Ministériu Negósiu Estranjeiru no Kooperasaun (MNEK) informa, liña koordenasaun entre parte protokolu no liña ministeriál sira di’ak los.  “Ami sempre halo reuniaun kada semana-semana, reuniaun para bele fó seguransa husi parte lojístika no transporte,” nia haktuir.

Iha ámbitu enkontru  ne´e, Vise Koordenadór Jerál Protokolu, Juvêncio de Jesus Martins relembra Prezidente Komisaun Organizadora, Kay Rala Xanana Gusmão dehan katak lembra de’it ba munisípiu tolu hanesan Lautem, Baucau, Viqueque. “Atu lembra de’it ba munisípiu tolu; Lautem, Baucau, Viqueque, kuandu imi halo reflesaun, labele haluha matebian, sira matebian importante tebtebes,” nia fó hanoin.

Tuir nia, Prezidente Komisaun Organiza mós hateten, iha Lautem, Baucau, Viqueque, reflesaun ne’e husi katuas sira la’ós joven sira, para joven sira simu istória ne’e hodi kompriende katak buat ne’e la’o oinsa.

“Enkontru ne’e, la’ós enkontru ba ikus nian maibé semana oin haree fali iha setór balun ne’ebé  seidauk deskuti, semana oin foin hatene enkontru ikus bainhira,” informa diretór jerál hanesan mós vise koordenadór jerál ba protokolu ne´e.

Notísia relavente: http://www.tatoli.tl/2019/07/komemorasaun-konsulta-popular-hodi-hanoin-hikas-tinan-20-liuba/?fbclid=IwAR0dA55OAYY_QhefU_4IkPmFjGkX5bIyK7IGGHHAHX2k_fFrhh5sH89NhRw

Jornalista: Nelia Fernandes

Editór     : Rafy Belo

HAKEREK NO HATÁN

Please enter your comment!
Please enter your name here