DILI, 11 jullu 2019 (TATOLI)—Diretora Care International iha Timor-Leste, Nicole Seibel, hateten inan-aman sira iha papél kontrola menu programa merenda eskolár.

Care International liuhosi programa Hahán ne’ebé Atu fó Tulun ho Edukasaun no Nutrisaun (HATUTAN) iha Timor-Leste ho objetivu atu hasa’e literásia ba estudante sira no mós hasa’e prátika saúde iha área nutrisaun, ijiene iha eskola ho uma-laran.

Nia dehan, durante ne’e, Asosiasaun Inan-Aman no inan-aman rasik la kontrola menu ne’ebé implementa iha programa merenda eskolár.

“Ida ne’e mak pontu fraku inan-aman nia partisipasaun no ‘Asosiasaun Pais’ sira. Loloos, sira iha kna’ar importante ba monitorizasaun iha menu programa merenda eskolár,” dehan nia iha Timor Plaza, hafoin lansa programa HATUTAN, kinta (11/7).

Diretora Care International-HATUTAN, esplika involvimentu inan-aman iha asuntu hirak ne’e importante no sai xave ba estudante sira iha prosesu aprendizajen.

Nia hateten, involvimentu inan-aman ba programa merenda eskolár atrai estudante sira-nia partisipasaun iha  eskola, alunu sira la falta eskola no sira bele iha atensaun di’ak iha aula.

“Se kabun mamuk, alunu sira la atensaun ba matéria matemátika, entaun HATUTAN sei ajuda Governu hadi’a situasaun ne’e,” katak nia.

Nia hatutan, partisipasaun Ministériu Saúde kona-ba eskolla hahán ho nutritivu iha programa merenda eskolár ne’e, hodi hili menu ne’ebé merese ba estudante sira iha ensiñu primária.

“Ne’e presiza reforsa ho fornesedór sira ho kuzineiru sira iha eskola, ne’ebé oinsá bele implementa programa merenda eskolár ne’e,” nia haklaken.

Nicole Seibel esklarese katak inan-aman ho responsável eskola tenke kontrola didi’ak labarik sira molok han, katak sira fase-liman ho sabaun ka lae no tenke observa didi’ak hahán ne’e ijiéniku ka lae.

Tuir nia, hahán la’ós ho karboidratu de’it, importante liu mak hahán iha vitamina no proteína, nune’e estudante sira bele hetan saúde di’ak. Programa nee hahú iha agustu tinan ida ne’e.

Notísia relevante: http://www.tatoli.tl/2019/07/eua-apoia-millaun-26-haforsa-programa-hatutan/

Jornalista: Evaristo Soares Martins

 Editór: Xisto Freitas

HAKEREK NO HATÁN

Please enter your comment!
Please enter your name here