Ministru Ensiñu Superiór, Siénsia no Kultura, Longuinhos dos Santos. Imajen Tatoli/Egas Cristóvão

Dili, 31 jullu 2019 (TATOLI)-Ministru Ensinu Superiór Siénsia Kultura (MESSK), Longuinhos dos Santos deklara katak maske komunidade sira ezije instituisaun ensinu superiór sira tenke loke klase paralelu iha munisípiu sira, maibé importante maka tenke garante nafatin ninia kualidade.

Preokupasaun Ministru Longuinhos nian ne’e bazeia ba deklarasaun Magnífiku Reitór Universidade da Paz (UNPAZ) Lucas da Costa nian kona-ba ezisténsia klase paralelu rua iha munisípiu Suai no Ermera sira hari tanba ezisténsia komunidade nian no mós klase paralelu ne’e la hanesan ho klase sira iha arredores kampus nian.

Membru governu ne’e dehan regra ne’ebé iha hatudu ona katak instituisaun ensinu superiór privadu ka públiku bainhira hakarak loke klase paralelu iha munisípiu sira tenke kontinua mantein nafatin padraun ne’ebé iha. Tenke garante nafatin ninia kualidade.

“La’ós razaun ida tan de’it ejijénsia komunidade sira nian instituisaun sira ba loke ona klase sira ne’e sein garante ninia kualidade. Mezmu ita simu ejijénsia joven ka komunidade sira nian maibé tenke garantia kualidade ba joven sira para bele kompete iha kampu traballu,” tenik Ministru Longuinhos dos Santos ba jornalista TATOLI hafoin ramata enkontru Konsellu Ministru iha Palásiu Governu, ohin.

Nia dehan, Programa fiskalizasaun ne’ebé VIII Governu Konstitusionál halo daudaun ona ba klase paralelu sira iha munisipiu hotu ne’e para rekolla dadus para bele hatene fallansu ka kazu saida mak akontese iha klase sira ne’e.

Governante ne’e hateten, kuandu fiskalizasaun ne’e ramata ona governu sei halo analiza bazeia ba meteorolojia ne’ebé iha atu hatene kazu saida mak akontese iha klase sira ne’e depois governu sei kontaktu ho responsavel Instituisaun Ensinu Superiór sira hafoin mak sei foti desizaun.

Portantu, agora daudaun fiskalizasaun ne’e foin ba klase paralela UNPAZ nian ne’ebé lokaliza iha área Santa Rosa, Suai, Munisípiu Covalima. Ne’e duni, sei falta munisípiu seluk oras ne’e daudaun sei iha hela prosesu nia laran.

Notísia relevante: http://www.tatoli.tl/2019/07/31/reitor-unpaz-prontu-fasilita-messk-hasoru-estudante-klase-paralelu/

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here