Reitór UNPAZ, Lucas da Costa. Foto: Beritasatu.com

DILI, 30 jullu 2019 (TATOLI)- Magnifiku Reitór Universidade da Paz (UNPAZ) Lucas da Costa hateten, hakfodak kuandu Ministru la hasoru malu ho estudante no dosente sira iha klase paralela Suai, Covalima. Tan ne’e nia prontu fasilita se uainhira Ministru Ensinu Superiór Siénsia no Kultura (MESSK), Longuinhos dos Santos, hakarak atu hasoru ninia estudante sira.

“Ha’u hakfodak kuandu Ministru ba iha loron baibain otomatikamente la bele hasoru malu ho estudante sira tanba atividade klase paralela ne’e realiza iha loron sesta to’o domingu tanba husi loron tolu ne’e mak ami-nia dosente sira foin sai husi Dili atu hanorin estudante sira ne’e,” hateten Reitór UNPAZ, Lucas da Costa iha entrevista ho jornalista TATOLI, iha nia kna´ar fatin, Kampuz UNPAZ, Osindo, Manleuana, tersa (30/07/2019).

Maske nune´e, tuir reitór instituisaun akadémika privada ne´e katak prontu hein nafatin posiblidade Ministru Ensinu Superiór Siénsia no Kultura nian uainhira hakarak halo fali vizita ba Suai atu hare klase paralela UNPAZ, maibé antes ne’e, MESSK tenke halo kontaktu uluk ho parte UNPAZ nian para bele informa ba estudante no dosente sira atu bele prepara.

Tuir nia katak membrus Governu ne’e la bele hasoru malu ho estudante no dosente sira tanba klase ne’e ninia prosesu ensinu da aprendizazen hala’o iha sesta to’o domingu, loron baibain laiha atividade tanba estudante sira ne’e barak mak hela dook no servisu hotu.

Iha biban hanesan, Reitór UNPAZ, Lucas da Costa konsidera, la hetan informasaun katak oráriu ne’e iha ona mudansa. Tanba oráriu ne’ebé publika iha kaudaru avizu ne’e realidade, ninia prosesu ensinu da aprendizajen hahú husi segunda to’o sesta ho oras tuku 05:30 lokraik. Tan ne’e nia hakfodak.

“Ha’u la hatene mudansa oráriu ne’e maibé tuir oráriu ne’ebé mak ha’u hatene sesta, sábadu no domingu mak realiza klase paralela ne’e. Ha’u la hatene tan sa mak oráriu ne’e monu fali ba loron baibain depois ha’u sei orienta fali ekipa ida atu check (konfira),” nia konfirma.

Notísia relevante: http://www.tatoli.tl/2019/07/29/aula-mamuk-governu-sei-deside-destinu-klase-paralelu-unpaz-suai/

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here