Ministra Solidariedade Sosiál no Inkluzaun, Armanda Berta dos Santos. Imajen/Egas Cristovão

DILI, 30 jullu 2019 (TATOLI)-Ministra Solidariedade Sosiál no Inkluzaun (MSSI), Armanda Berta dos Santos, hatete, nia parte konsidera ezijénsia Asosiasaun Defisiénsia Timor Leste (ADTL) atu  ratifika Konvensaun direitu ba  ema ho defisiénsia (EHD) iha Timor-Leste.

Notísia Relevante : ADTL Husu Ba Governu Atu Ratifika Konvensaun Direitu EHD

Ministra Armanda Berta dos Santos informa, daudaun ne’e ekipa tékniku MSSI prepara kondisaun liuliu planu asaun nasionál ba ema defisiénsia hodi aprezenta ba Konsellu Ministru hodi hetan apresiasaun molok Parlamentu Nasionál ratifika konvensaun ne’e.

“Ita kontinua halo preparasaun   atu asina konvensaun internasionál ne’e bainhira hetan ona autorizasaun hosi Konsellu Ministru. MSSI halo esforsu hodi buka meius hotu-hotu atu servisu ho entidade  relevante sira atu bele realiza iha tinan ne’e ou tinan oin,” informa Ministra Armanda Berta dos Santos, ohin, iha Edifísiu Ministeriu Transporte no Komunikasaun (MTK), Caicoli, Dili.

Iha okaziaun hanesan, Diretór Asosiasaun Defisiénsia Timor-Leste (ADTL sigla-Portugés) Cezario da Silva, hatete, Governu trasa ona planu asaun anuál, planu asaun nasionál ba ema ho defisiente maibé ninia implementasaun seidauk másimu hodi proteje diretu ema ho defisiénsia tanba ne’e presizia ratifika tan Konvensaun direitu ba ema ho difisiénsia.

“Vantajen mai ita ratifika konvensaun ne’e, primeiru lei nasionais sira ne’ebé mak iha karik implika ema ho defisiénsia entaun ita tenke adopta tuir konvensaun,” hateten Cezario da Silva.

Nia fó ezemplu  ko’alia kona-ba edukasaun inkluziva, lian jestu nasionál, transporte asesivel, dezeñu universál ba konstrusaun hotu-hotu tenke hamosu asesibilidade, orsamentu sensivel ba asuntu ema ho defisiénsia no seluk tan.

Jornalista  : Nelson de Sousa

Editór        :  Francisco Simões  

HAKEREK NO HATÁN

Please enter your comment!
Please enter your name here