Diretór Ezekutivu ADTL, Cesario da Silva. Foto FB: Dize Cesário Adhabel

DILI, 11 jullu 2019 (TATOLI)-Diretor Ezekutivu Asosiasaun Defisiénsia  Timor Leste (ADTL), Cesário da Silva, husu ba governu atu ratifika ona konvensaun direitu ba ema ho defisiénsia (EHD).

Dezde 2012, ADTL halo ona esforsu atu  governu Timor Leste bele ratifika konvensaun refere, maibé to’o agora seidauk  hetan resposta pozitivu.

“Ami-nia preokupasaun mak governu halo buat sira ne’e sai hanesan kompromisu de’it entaun asosiasaun ho nia membru sira nafatin iha esforsu halo advokasia beibeik ba governante sira atu ratifika konvensaun ne’e,”  hateten Cesário da Silva, ohin, ba Ajénsia TATOLI, iha Mascarenhas, Dili.

ADTL husu beibeik ba governu liuhusi Ministériu Solidariedade Sosiál Inkluzaun (MSSI), Primeiru-Ministru   ho mós ba Parlamentu Nasionál para hanoin ona oinsá mak bele ratifika lalais konvensaun direitu EHD.

Cesário informa, ADTL nia programa prioridade boot tolu, hanesan primeiru mak edukasaun kapasitasaun tanba ADTL hakarak ema ho defisiénsia asesu ba edukasaun iha ne’ebé ema hotu-hotu direitu hanesan.

Segundu,  empoderamentu polítiku ADTL mós hanoin hela atu sira bele halo atividade ekonómika atu bele transforma ema nia moris barak liu ba públiku nia espetativa katak EHD ne’e labele halo buat ida sira merese apoiu iha uma de’it, maibé ADTL hakarak halo ne’e EHD ne’e halo atividade negósiu agrikultura ka atividade saída de’it mak sira bele halo entaun liu hosi buat hirak ne’e bele muda sosiedade sira-nia pensamentu.

Terseiru, atividade advokasia mak tenke prioritiza atu halo ratifikasaun konvensaun ONU nian ba direitu EHD no prioritiza mós ba estabelesimentu konsellu nasionál EHD.

Prioritiza seluk, ADTL husu Ministériu Obras Públika (MOP) atu dezeñu konstrusaun hotu-hotu tenke haree ona asosiabilidade ba EHD tanba edifísiu barak mak sira labele asesu no laiha asosiabilidade.

Nia mós esklarese katak ADTL serbisu hamutuk ho Universidade Nasionál Timor Lorosa’e (UNTL) atu oinsá sira bele estabelese kursu ida ba ho naran reabilitasaun baze Komunitária, uluk ho diploma I agora sa’e ba diploma III (Baxarelatu) kursu ho naran inkluzaun komunitária sosiál (ICS) daudaun ne’e ativa iha UNTL no tinan-tinan sira recomenda EHD hodi estudu iha ne’ebá.

Númeru ema ho defisiénsia boot liu, kuaze 50-liu mak gradua ona iha UNTL, nune’e mós programa ezame equivalência daudauk ne’e ADTL serbisu hamutuk ho Ministériu Edukasaun (ME) diresaun ensinu rekorrente prepara EHD atu bele eskola, durante fulan neen to’o tinan ida, nune’e ikus sira bele tuir ezame hetan sertifikadu ho nivel primária sa’e ba pre-Sekundária no kontinua nafatin.

Jornalista          : Osória A. Marques

Editór                : Francisco Simões

HAKEREK NO HATÁN

Please enter your comment!
Please enter your name here