Tribunal Distritál Dili (TDD), sesta (26/07/2019), aplika pena prizaun preventiva ba suspeitu na'in 11 ne'ebé envolve iha kazu Leorema. Imajen/Domingos Piedade Freitas

DILI, 26 jullu 2019 (TATOLI) – Suspeitu na’in 11 ne’ebé involve iha kazu omisídiu Leorema, ohin, kumpre pena prizaun preventiva ne’ebé aplika hosi Tribunal Distritál Dili (TDD).

Notísia Relevante : Konfrontu iha Baura, Joven Nain Rua Mate, Tolu Kanek no Uma Neen Hetan Sunu

Familia Uma Kain 53 Seidauk Fila Ba Leorema

Suspeitu hirak  ho inisiál JC, TS, AP, MLM, AS, LC, CM, JDC, EL, DC ho DAV, Ministériu Públiku akuza ho krime omisídiu agravadu ne’ebé mak previstu iha kódigu penal 139 no arma branka.

Rona desizaun tribunal nian ne’e, suspeita DAV sente arrepende tebes no tanis maka’as iha sala audiénsia julgamentu. DAV ho nia kaben JC tenke tama prizaun preventiva no hanoin la to’o ba sira nia oan kaduak ne’ebé oras ne’e iha hela  Polisia Liquiça.

Hosi suspeitu na’in hirak ne’e iha mós suspeitu ida nu’udar autoridade lokál iha Suku Leorema.

Advogadu privadu, Rui Antonio Mendonça, ne’ebé fó asisténsia legal ba suspeitu sira hateten, primeiru interrogatóriu Tribunal perante Juis Maria Modesta, hasai ona desizaun final ba suspeitu na’in 11 hodi tama prizaun preventiva.

Suspeitu sira envolve ativa ba kazu omisídiu ne’ebé akontese iha Aldeia Baura, Suku Leorema, Postu Administrativu Bazartete, Munisípiu Liquica iha loron 04 jullu 2019.

“Ba kazu nee, defeza labele ko’alia tanba segredu justisa no sei hein prosesu investigasaun,” tenik Rui Antonio Mendonça.

Nia mós lamenta tebes ho desizaun Tribunal no sei halo rekursu ba Tribunal Rekursu, tanba tribunal primeira instánsia hola desizaun la umanizmu  tanba suspeitu DAV no JC nia oan kaduak iha hela PNTL Liquiça.

“Agora sira na’in rua nia oan, se mak tau matan,” hateten Rui Antonio Mendonça.

Nia lamenta mós tanba suspeitu sira ne’e balun la envolve direita no sira la iha fatin akontesimentu. Maibé, sira simu konsekuénsia hotu hanesan suspeitu seluk ne’ebé bele deskonfia hanesan arguido ka autór.

Audiénsia nee prezide hosi Juis Maria Modesta, Ministériu Públiku reprezenta Prokuradór Jacinto Babo, arguido sira hetan asisténsia legal hosi advogadu Rui Antonio Mendonça ho Arnaldo da Conceicáo Lopes.

Liquiça Kontroladu

Maske kazu Leorema nia implikasaun halo komunidade ua’in trauma no ta’uk hodi halo uma kain balun tenke evakua ba Liquiça vila, maibé Komandu Polisia Liquiça garante nafatin situasaun hakmatek no kontroladu iha area jurizdisaun Polisia Luquiça nian.

 “Ha’u hanoin problema ne’ebé mosu iha rai laran atu ki’ik ka boot nee, responsabilidade ita hotu nian, la’ós Polisia nian mesak ou la’ós autoridade lokál nian mesak, la’ós veteranu sira nian mesak, maibé  responsabilidade ita tomak nia,” hateten reprezentante komandante PNTL  Munisípiu Liquiça, Abilo Felipe, iha nia diskursu bainhira partisipa iha diskusaun lei Kostumeiru  no justisa tradisionál, ohin,  ne’ebé organiza hosi Ministériu Reforma Lejizlativa no Asuntu Parlamentár  (MRLAP) iha Munisípiu Liquiça.

Nia mós afirma liu tan katak, atu garante pás no estabilidade iha rai laran, responsabilidade hosi entidade nian tomak, no labele fó fiar de’it ba autoridade seguransa  mesak, tanba pás ho estabilidade ne’e mai hosi ema ida-idak no família ida-idak.

Iha fatin hanesan  Guido Ramos Ribeiro hanesan Xefe Suku Bubuleu hatutan, loos foin daudauk mosu konflitu balun iha Leorema hodi rezulta joven balu mate fatin no sumu uma hitu, maibé problema tama ona iha tribunal.

“Kazu ne’e iha ona tribunal no hein nia rezultadu,” hateten Guido Ramos Ribeiro.

Jornalista : Domingos Piedade Freitas

Editór       :  Francisco Simões

HAKEREK NO HATÁN

Please enter your comment!
Please enter your name here