VARANDA JUSTISA Familia Uma Kain 53 Seidauk Fila Ba Leorema

Familia Uma Kain 53 Seidauk Fila Ba Leorema

183
Komandante Polisia Munisípiu Liquiça, Superintendente Asistente, Luis da Silva. Imajen/Eugénio Pereira

DILI, 17 jullu 2019 (TATOLI)-Komandu Polisia Nasional Timor-Leste (PNTL) Munisípiu  Liquiça, seidauk bele re-íntegra komunidade família uma kain 53 ba sira ida-idak nia horik fatin iha Loerema, tanba suspeitu prinsipál seidauk kaptura.

Komandante Polisia Munisípiu Liquiça, Superintendente Asistente, Luis da Silva, esplika, família uma kain  53 sei trauma atu fila ba sira nia suku no aldeia, tanba too agora suspeitu prinsipál ida husi kazu krime omisídiu iha  Suku Leorema PNTL seidauk kaptura no prosesu diálogu nahe biti boot mós seidauk realiza.

“Ita sei halo diálogu envolve parte hotu-hotu inklui governu depois maka foin bele re-íntegra fila fali komunidade uma kain 53 ne’e fila ba Leorema,”informa Komandante Luis  da Silva, ohin, ba jornalista iha Komandu PNTL, Caicoli, Dili.

PNTL rasik kaptura ona suspeitu na’in 13, no arguido SP ne’ebé maka rekoñese halo krime omisídiu ba vítima sira tama ona prizaun preventiva iha Becora no sira seluk sei iha prosesu investigasaun.

“Agora suspeitu ida ne’ebé maka halai ami deskonfia suspeitu prinsipál hotu, tanba envolve oho vítima ida, hamutuk ho arguido SP ne’ebé rekoñese halo krime omisídiu ba vítima sira,” hateten Komandante Luis.

Nia husu atu grupu ilegál sira ne’ebé subar suspeitu iha Liquiça, Ermera ka Dili no fatin seluk, atu entrega suspeitu ba PNTL hodi responsabiliza ba krime ne’ebé suspeitu komete.

Komandu PNTL mós foin lalais ne’e simu informasaun husi grupu ilegál sira atu tenta sunu merkadu vila Liquiça, tanba ne’e parte PNTL halo nafatin seguransa makas.

“Grupu (ilegál) balun atu asaltu tan merkadu Liquiça, tanba ne’e PNTL alerta um halo ona seguransa makas iha merkadu hodi kontrola sasán kro’at,” tenik Luis da Silva.

Komandante PNTL Liquiça ne’e mós lamenta kazu Leorema nian ne’e envolve direita Xefe Suku ho inisiál ADS ne’ebé envolve iha grupu ilegál sira maka organiza halo asaltu oho vítima na’in rua, no hakanek ema na’in tolu inklui sunu uma no motór.

Agora daudaun Xefe Suku Leorema ho inisiál ADS no suspeitu sira seluk sei detein hela iha Sela Komarka Liquiça hodi submete ba investigasaun kle’an.

Situasaun seguransa iha Leorema kontinua alerta um no hetan seguransa makas husi parte Polisia Unidade Espesiál no Polisia Liquiça nian.

Kona-ba situasaun estudante na’in 13 kompostu Eskola Sekundária no Pre-Sekundária ne’ebé seidauk ba eskola iha Leorema, agora Edukasaun Munisipiu Liquiça provizóriu simu sira partisipa aula prosesu aprendizajen iha Liquiça hodi hein too situasaun hakmatek foin bele fila ba Leorema.

Jornalista      : Eugénio Pereira  

Editór           : Francisco Simões

HAKEREK NO HATÁN

Please enter your comment!
Please enter your name here