Autoridade lokál sira iha Munisípiu Liquiça partisipa konsultasaun públiku ba Lei Kostumeiru no Justisa Tradisionál ne'ebé halo hosi MRLAP, sesta (26/07/2019). Imajen/Domingos Piedade Freitas

LIQUIÇA, 26 jullu 2019 (TATOLI) – Ministériu Reforma Lejizlativa no Asuntu Parlamentár, ohin, kontinua  halo konsultasaun públiku ba lei kostumeiru no justisa tradisionál iha Munisípiu Liquiça.

Notísia Relevante : MRLAP Halo Konsulta Públiku Ba Lei Kostumeiru ho Justisa Tradisionál Iha Ermera

Konsultasaun públiku kona-ba Lei Kostumeiru ho Justisa Tradisionál ne’ebé hala’o hosi MRLP iha ba autoridade lokal Munisípiu Liquiça, sesta (26/07/2019). Imajen/Domingos Piedade Freitas

Konsulta públiku ida nee sei hala’o iha territóriu tomak, tuir lian ida idak nian mak MRLAP identifika iha lian 18 no total konsulta públiku ne’ebé MRLAP sei halo hamutuk 25.

Xefe Gabinete MRLAP, Andre Leto esklarese objetivu konsultasaun públiku ne’e atu halo levantamentu informasaun hosi lia na’in sira bazeia ba étniku ka dalen, ho nune’e, MRLAP bele hatene lei kostumeiru no justisa tradisionál espesialmente ba étniku Tokodede.

“Ha’u hanoin Governu liuhosi MRLAP rona lia na’in no liurai sira kona ba étniku Mambae, Tokodede, Naueti, Tetun, Makasae, Uaima’a, Fataluku, Midiki  no seluseluk tan, atu sai referensia hodi halo ezbosu lei,” hateten ba Andre Leto ba Ajénsia TATOLI, iha edifísiu administrasaun Munisípiu Liquiça.

Nia hateten, direitu ba lei kostumeiru no justisa tradisionál bele hetan rekoñesimentu hosi estadu no justisa formal sira. Tanba ne’e, lia na’in sira atu fó informasaun ho loloos no klaru kona ba prosesu lei tradisionál ne’ebé durante lao nanis ona.

Andre Leto esplika, klaru katak, iha konflitu balun ne’ebé resolve liuhosi dalan ba justisa formal ezemplu kazu sira krime omisídiu agravadu, maibé ba mós kazu sivíl sira, nune’e mós krime ne’ebé simples bele resolve liuhosi dalan justisa tradisionál.

Nia mós konsidera katak prosesu ida lao nanis tiha ona iha komunidade nia leet, antes kolonizasaun hosi Portugés, maibé ba prosesu too ohin loron seidauk iha koñesimentu hosi justisa formal. Tanba nee, hosi polítika oitavu Governu ne’ebé tau prioridade ba justisa tradisionál hetan fatin ka rekoñesimentu hosi estadu ka lei justisa formal, nune’e métodu justisa tradisionál vigora bainhira halo rezolusaun konflitu.

Iha fatin hanesan, Sekretáriu Adjuntu Administrativu Liquiça, Renato Moniz Serão, lori administrativu nia naran hakarak fó benvindu no agradese ba Governu liuhosi MRLAP ne’ebé mak partilla informasaun ba lei kostumeiru no justisa tradisionál ba lia na’in no liurai sira.

“Ha’u husu ba autoridade sira atu partisipa no kolabora didi’ak atu bele fó idea ne’ebé mak di’ak no loos ba iha Governu liuhosi MRLAP atu halo formaliza justisa tradisionál ho di’ak,” Renato Moniz Serão tenik.

Nia konsidera, ho partilla informasaun hosi peritu no asesór sira hosi MRLAP ba lia na’in no liurai sira hosi suku 23 bele rezolve di’ak liu tan problema kriminál no sivíl bainhira lei tradisionál ne’e sai  tiha lei formal ida.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here