MRLAP halo konsutasaun puúbliku ba Lei Kostimeiru ho Justisa Tradisionál iha Munísipiu Ermera. Imajen/Domingo Piedade Freitas

ERMERA, 25 jullu 2019 (TATOLI)– Ministériu Reforma Lejizlativa no asuntu Parlamenteres (MRLAP), ohin,  halo konsulta públiku ba lei Kostumeiru no Justisa tradisionál ba autoridade sira iha suku 52  no postu lima iha Munisípiu Ermera.

Xefe Gabinete MRLAP, Andre Lote . Imajen/Domingos Piedade Freitas

Xefe Gabinete MRLAP, Andre Lote esplika objetivu hosi konsultasaun mak atu rona informasaun hosi autoridade suku no lia na’in sira, atu Governu tau iha regra justisa tradisionál no lei kostumeiru ninian hodi hetan rekoñesimentu husi justisa formal.

“Ha’u ho MRLAP nia naran hakarak hato’o agradese ba ita sira no husu atu hato’o informasaun ho loloos no onestu, atu nune’e lalika difikulta fila fali lei justisa formal ne’ebé mak sei implementa husi Governu,” hateten Andre Lote ba jornalista sira, iha salaun Parokiál Ermera nu’udar fatin konsentrasaun ba atividade konsultasaun ne’e.

Nia hatutan saida mak governu hanoin daudaun nee mai hosi sujestaun no ideas hosi autoridade hotu iha Ermera kona ba lei kostumeiru sira nee.

“Se la fó informasaun loloos mak sei afeta ba planu ne’ebé tau iha justisa tradisionál,” afirma Andre Lote.

Andre mós esplika tan katak governu mai rona ideas no sujestaun balun hosi lider komunitáriu sira atu kompleta malu, la’ós atu soke malu fila fali ho lei kostumeiru maibé oinsá atu hadi’a di’ak liu tan lei formal iha futuru mai.

Nia mós esplika kona ba prinsípiu ba kostume mak atu rekoñese no valoriza norma sira no uzu kostumeiru sira TL nian, bainhira la kontra konstituisaun ka lejizlasaun ne’ebé trata liuliu ba direitu kostumeiru no respeitu ba norma konsuetudinária sira nian hanesan mós mekanizmu tesi lia sira nian ne’ebé asosia ba.

Iha biban hanesan, Raimundo de Araújo nu’udar Adjuntu Komandante PNTL Munisípiu Ermera hato’o agradese ba Governu liuhosi MRLAP ne’ebé mak pela primeira vés hodi mai rona lian na’in sira nia ideas hodi apár ho lei formal.

“Ha’u hanoin lei tradisionál ne’ebé mak implementa iha munisípiu Ermera, nomeadamente ita iha ona lei kostumeiru ne’ebé hahú tiha ona iha tinan 2012,” hateten Komandante Raimundo de Araújo.

Nia husu ba autoridade hotu iha Munisípiu Ermera atu fó ideas hodi lei tradisionál no formal bele kompleta malu liu tan, la’ós atu soke malu.

Jornalista          : Domingos Piedade Freitas

Editór                 : Francisco Simões

HAKEREK NO HATÁN

Please enter your comment!
Please enter your name here