Xefe Departamentu Relasaun Internasionál UNPAZ, Luis Pereira Cardoso. Foto TATOLI: Nelia Fernandes

DILI, 26 jullu 2019 (TATOLI)-Xefe Departamentu Relasaun Internasionál, Universidade da Paz (UNPAZ), Luis Pereira Cardoso hateten katak Timor Leste presiza prienxe kritéria ne’ebé sai rekomendasaun hosi ASEAN (Organizasaun Sudeste Aziátika-sigla inglés) hodi halo adezaun.

“Papél importante hosi akadémika mak oinsá fó hanoin ba ita-nia estadu, primeiru ba governu ne’ebé ka’er ukun agora (Oitavu Governu), oinsá para bele halo lalais saida mak sai hanesan, kritéria sira ne’ebé presiza prienxe, ne’ebé hetan rekomendasaun hosi ASEAN nian, atu nune’e bele alkansa lalais Timor Leste ba membru ASEAN ba dala 11,” hateten Xefe Departamentu, Luis Pereira Cardoso, ba Ajénsia TATOLI,  iha Osindo, Manleuana, Dili, sesta (26/07/2019).

Nia esplika, hanesan akadémiku, presiza fó hanoin ba governu ba asuntu sira ne’ebé la’o ladún lais. “Ezemplu hanesan iha pilar tolu ne’ebé hetan rekomendasaun hosi ASEAN sira; pilar ekonomia, seguransa no sósiu-kultura, presiza hadi’a lalais atu nune’e bele garante ba membru sira seluk, liuliu sekretariadu ASEAN, atu bele halo kompleta lalais, prienximentu ba Timor-Leste sai hanesan membru ASEAN”.

Akadémiku UNPAZ ne’e konsidera, karik pilar tolu ne’e lá atinje signifika ida ne’e ita (Timor-Leste) sei dada tan ba kotuk. “Tanba ita halo ona pedidu ba iha 2011 mas to’o agora ita seidauk atinje atu tama ba membru ASEAN”.

“Kontribuisaun ne’e ami (akadémiku) fó ideia, ami iha ne’e halo seminar beibeik, se Timor-Leste tama, iha nia benefísiu no dezafiu ne’e saida, ne’ebé ha’u hanoin saída mak sai hanesan rekomendasaun (husi ASEAN), kontribuisaun akadémiku sira, sempre fó hanoin ba preparasaun ne’ebé Timor-Leste presiza atu tama ba ASEAN,” hatutan tan Xefe Departamentu Luis Pereira Cardoso.

Akadémiku ne’e fó ezemplu, iha aspetu barak ne’ebé mak ita presiza hadi’a, ezemplu iha asuntu ekonomia, ita presiza hadi’a ita-nia produtu lokál sira, presiza haree didi’ak, se lae ita tama tiha ba ASEAN; ansi atu tama, maibé dala ruma ita-nia ekonomia lokál seidauk prontu, ita fó lukru fali ba membru ASEAN seluk ne’ebé preparadu ona iha merkadu globál ninian. “Ho ida ne’e ita kuaze atu konsumu barak fali ema nia produtu sira duke ita nian rasik,” nia konsidera.

Profesór universitáriu ne’e esplika tan katak bainhira ita tama ba ASEAN, presiza haree mós seguransa tanba mós pilar importante ida ne’ebé rekomenda hosi sekretariadu ASEAN nian.

“Hanesan akadémiku fó hanoin ba governu nia preparasaun, karik ita tama ASEAN, oinsá preparasaun iha fronteira, aeroportu, tasi ninian, preparadu ka lae. Entretantu, se ita konsege adere ba ASEAN, hanesan akadémiku ita fó ita-nia kontribuisaun ideia, bazeia ba siénsia sira ne’ebé iha,” kompromete akadémiku ne’e UNPAZ ne’e.

Notísia relevante: http://www.tatoli.tl/2019/07/19/tama-asean-kontribuisaun-akademiku-mak-forma-rekursu-umanu/

 Jornalista       :Nelia Fernandes

Editór             : Rafy Belo

HAKEREK NO HATÁN

Please enter your comment!
Please enter your name here