Xefe Departamentu RI, UNTL, Moises da Costa. Foto TATOLI: Nelia Fernandes

DILI, 18 jullu 2019 (TATOLI)-Akadémiku Universidade Nasionál Timor Lorosa´e (UNTL) konsidera katak bainhira Timor-Leste (TL) sai membru ba Organizasaun Sudezte Aziátiku (ASEAN-sigla inglés), tenke forma rekursu umanu.

“Kontribuisaun husi akadémika, primeiru ita tenke forma rekursu umanu, liliu ba ona parte relasaun  internasionál depois mós ita haree rekursu umanu iha parte saída; parte sosiál, ekonomia, negósiu internasionál, polítika, ne’e mak importante ba ita,” hateten Xefe Departamentu Relasaun Internasionál (RI), UNTL, Moises Martins da Costa ba Ajénsia TATOLI iha Kampus UNTL, Kaikoli, Dili, sesta (19/7/2019).

Nia akresenta, bainhira Timor Leste tama ASEAN, ita tenke prepara rekursu umanu, rekursu naturál no rekursu teknolojia. “Tanba ASEAN ne’e la’ós ita tama de´it, ita tenke kompetisaun iha ne’ebá, liliu  ba ona iha AFTA (ASEAN Free Trade Area); buat ida importante iha ne’ebá, rua mak ita presiza halo kompete; ida mak livre merkadu, livre negósiu. Ho buat sira ne’e ita tenke preparasaun ho rekursu umanu ne’ebé mak iha”.

Akadémiku ne´e mós reforsa, Departamentu Relasaun Internasional (UNTL) ninia preparasaun liliu mak rekursu umanu. “Prepara rekursu umanu, ita tenke aumenta sira-nia kapasidade, kualidade di´ak, atu nune’e ita mós bele tama área rejiaun refere”.

Xefe Departamentu RI, Moisés Martins da Costa akresenta tan kontribuisaun husi akadémika mak formasaun ba estudante sira atu bele kompete iha ASEAN. “Prespetiva mak primeiru ita tenke haree vizaun ho misaun. Vizaun katak ita mós bele forma sira, atu nune’e sira mós bele sai rekursu umanu ne’ebé mak paz no kualidade atu bele halo kompete iha ne’ebá. Misaun mak ita mós bele tama iha ne’ebá atu kompete”.

Nia subliña, estratéjia polítika externa Timór nian saida mak ita tenke halo, negósiu. “Tanba atu kompete ona iha free market (merkadu livre) ho free trade (komérsiu livre), AFTA (ASEAN Free Trade Area) ne´e iha rejiaun boot tebes, mas agora ita forma,  presiza de´it sosiál, ekonomia ho seguransa, tolu ne’e mak ita importante iha ne’ebá,” konsidera akadémiku ne´e.

“Asia ninia sira mós bele exporta sasán sira mai ita hanesan sembako (sembilan bahan pokok-nesesidade bázika), tanba ita buat ida la iha, entaun hanusa maka ita bele halo buat ne’e, ita relasaun internasionál forma relasaun entre nasaun liuhusi rekursu umanu, sira tenke halo aprosimasaun polítika, estratéjika externa, timorense nian,” nia esplika.

Profesór univeresitáriu ne´e otimista katak timoroan iha kapasidade bele halo aprosimasaun polítika ba nasaun sira atu bele halo kooperasaun bilaterál, multilaterál ho trilatetál. “Ida ne’e mak ita presiza, karik ita tama ASEAN mak ita pasivu de’it labele, ita tenke ativu,” insiste xefe departamentu RI, UNTL, ne´e.

Notísia relevante: http://www.tatoli.tl/2019/07/hugo-lorenco-tama-asean-rekursu-umanu-importante/

Jornalista   : Nelia Fernandes

Editór          : Rafy Belo

HAKEREK NO HATÁN

Please enter your comment!
Please enter your name here