Eis Prezidente Autoridade RAEOA, Marí Alkatiri. Imajen António Gonçalves

OEKUSI, 25 jullu 2019 (TATOLI)—Hela semana ida tan, mandatu Prezidente Rejiaun Administrativa Espesial Oé-Cusse-Ambenu (RAEOA), Marí Bim Amude Alkatiri atu ramata.

Tanba ne’e, molok  atu prolonga ka hakotu mandatu, Alkatiri hato’o hela mensajen ba povu Oé-Cusse.

“Ha’u-nia mandatu sei ramata iha loron 30 fulan ne’e. Maibé, ha’u hakarak hato’o mensajen ba povu Oé-Cusse katak Oé-Cusse iha ha’u-nia fuan, iha ha’u-nia laran,” katak Marí ba Tatoli iha edifísiu Sekretaria Rejionál Edukasaun Solidariedade Sosiál RAEOA, kinta ne’e.

Alkatiri mós hakarak atu Timor-Leste sai hanesan Oé-Cusse, tanba nia halo komparasaun katak munisípiu 12  ne’ebé gasta ona millaun $1 ba kada munisípiu maibé la halo buat ida no Oé-Cusse ho de’it millaun $5 bele haree ona ninia rezultadu.

Ho ida ne’e, nia konsidera katak Oé-Cusse hanesan laboratóriu hodi sai hanesan referénsia ba munisípiu sira seluk.

Tuir planu, iha tempu badak, Alkatiri sei hale’u munisípiu 12, hahú hosi parte lorosa’e, atu halo sosializasaun kona-ba projetu iha Oé-Cusse, ne’ebé konsidera hanesan referénsia.

Alkatiri mós sei kestiona kona-ba orsamentu barak ne’ebé durante ne’e governu gasta ne’e ba ne’ebé no nia mós promete katak bainhira sai hosi Oé-Cusse sei la husik doit ida hanesan tusan.

Orsamentu ba projetu Zona Espesiál Ekonomia Sosiál Merkadu (ZEESM) hahú hosi tinan 2015-2019, hamutuk millaun $520 resin no gasta ona millaun $400 resin, maibé sei iha restu millaun $135.

Jornalista: Cipriano Colo

Editór: Xisto Freitas

Notísia relevante: Kona-ba Mandatu iha RAEOA, Alkatiri Hakerek Ona Karta ba PM Taur

1 KOMENTÁRIU

  1. Hau apresia mós ho Exua.Lideransa Fundador Mari Bing Amudi Alkatiri. Ho sugeres neebe mak informa liu hosi Tatoli Timor, atu nunee ita bele garantia ideias foun hosi Lideransa Nasaun nian, Tatoli nee hanesan meu Ida hodi aprofunda dezenvolvimento Rai Ida nee nia mudansas iha funturo. Tanba futuro iha ita nia planu, iha ita nia interested diak sira, iha mós ita nia komitmento makaas ba Importansia gerasaun sira aproveitamento futuro Merkadu international maka sei mosu ba Merkadu livre..nunee ita presiza prepara mudansa sira neneik iha loron ohin.

HAKEREK NO HATÁN

Please enter your comment!
Please enter your name here