Kazu Leorema, Tribunal Aplika Prizaun Preventiva Ba Arguido SPS
DILI, 08 jullu 2019 (TATOLI)–Tribunál Distritál Dili (TDD), ohin, hala’o primeiru interrogatóriu ba arguido SPS ne’ebé deskonfia envolve iha kazu omisídiu agravadu ne’ebé akontese iha Aldeia, Baura, Suku Leorema, Postu Administrativu Bazartete, Munisípiu Liquiça, Kinta loro-kraik (04/07/2019).
Iha akontesimentu ne’e, rezulta ema na’in rua (2) mate, na’in lima kanek no sunu uma hamutuk 13 ho motor hitu.
Iha primeiru interrogatóriu ne’e, Tribunál aplika prizaun preventiva ba arguido SPS atu labele perturba ba prosesu investigasaun tuir 183 kódigu prosesu penal.
Advogadu Privadu, Rui António Mendonça, ne’ebé fó asisténsia legál ba arguido SPS hateten, nia sei la ko’alia kona-ba lala’ok no faktu ne’ebé prodús iha prosesu primeira interrogatóriu ne’e tanba sei kategoria segredu justisa
Advogadu Rui António Mendonça hatutan, husi sirkunstánsia sira nee hotu, tribunál aplika medida koasaun prizaun preventiva ba arguido SPS hodi hein investigasaun profunda husi Ministériu Públiku.
Indísiu ne’ebé mak mosu iha primeiru interrogatóriu hatudu katak arguido SPS konfesa katak, nia pratika duni krime omisídiu agravadu ne’ebé previstu iha artigu 139 kódigu penal, ofensa agravadu previstu iha artigu 146 kódigu penal no arma Branka lei númeru 5/2017.
Audiénsia primeiru interrogatóriu nee prezide husi Juiza Edite Palmira, Ministériu Públiku reprezenta husi prokuradór Jacinto Babo, Rogeiro Viegas, Hernani no arguido SPS hetan asisténsia legal husi advogadu privadu, Arnaldo da Conceição Lopes, Ismael Lopes no Rui António Mendonça.
Notísia Relevante : http://www.tatoli.tl/2019/07/konfrontu-iha-ba…-neen-hetan-sunu/
http://www.tatoli.tl/2019/07/konfrontu-leorem…13-ho-motor-hitu/
Jornalista : Domingos Piedade Freitas
Editór : Francisco Simões
