Agus Mulyawan, jornalista Ajénsia Notísia Asia Pers Internasional

DILI, 10 jullu 2019 (TATOLI)—Aten-brani presiza atu hamriik no atu ko’alia, aten-brani mós presiza atu tuur no atu rona. Sai jornalista presiza aten-brani tanba jornalista sira mak ema sira ne’ebé iha solidariedade atu observa lala’ok podér nian no mós sai sentru ba podér ne’e rasik.

Hori tinan 1975, solidariedade internasionál ba Timor-Leste suli nanesan wee-mota suli tuir Mota Loes be la para. Apoiu umanitáriu sira ne’ebé mai hosi organizasaun internasionál sira, Timor-Leste sei labele nega. Iha parte informasaun, Timor-Leste hetan apoiu solidariedade hosi jornalista estranjeiru sira ne’ebé fó-án mai halo kobertura iha Timor-Leste, liliu foka ba violasaun direitu umanu no auto-determinasaun ba povu Timor nian.

Sander Robert Thoenes, jornalista “Financial Times” hosi Olanda

Iha prosesu atu hala’o Konsulta Populár iha Timor-Leste iha tinan 1999, jornalista estranjeiru lubun ida hosi mídia oioin mai halo kobertura ba prosesu oinsá povu Timor-Leste determina sira-nia destiñu liuhusi votasaun. Liafoun wa’in mak sira haklaken. Istória wa’in mak sira haktuir. Retratu wa’in mak sira hasai. Esperiénsia lubun mak sira hetan. Maibé, hosi hirak ne’e hotu, iha jornalista balun ne’ebé hetan esperiénsia moruk ne’ebé hetan baku, terrór no intimidasaun hosi membru grupu milísia pro-integrasaun sira.

Iha artigu “Rai-Hún Mutin Sa’e Dadaun Ona-X” ne’ebé liu dadaun, Agência TATOLI fó biban hodi tatoli netik jornalista timoroan ida-nia mate ne’ebé membru BRIMOB mak tiru mate iha Kuluhun de baixo, Dili. Iha biban ne’e, TATOLI haktuir solidariedade hosi jornalista internasionál sira-nia konribuisaun ba prosesu Konsulta Populár iha 30 agustu 1999 ne’ebé to’o ikus selu ho sira-nia mate.

Hafoin Sekretáriu Jerál Nasaun Unida, Kofi Annan, anúnsia rezultadu Konsulta Populár (referendu) ba mundu tomak iha 4 setembru 1999, iha jornalista internasionál balun ne’ebé tenke mate ba militár Indonézia nia krueldade. Atu hetan lia-loos kona-ba prezensa International Force for East Timor (INTERFET) no atu haklaken lia-loos ne’e liuhusi ninia profisaun, jornalista Olandés ida mate iha militár Indonézia nia liman iha área Becora.

Sander Rober Thoenes

Jornalista “Financial Times” hosi Olanda, Sander Robert Thoenes, nu’udar jornalista ida ne’ebé aten-brani no fiar án hodi hala’o ninia kobertura kona-ba prezensa forsa INTERFET iha área konflitu Becora. Maski, situasaun hafoin anúnsia rezultadu referendu manas hela, Sander Robert Thoenes, iha korajen hakarak haree situasaun iha parte Becora be sai hanesan konflitu nia hún.

Sasin-matan no motorista, Florindo da Conceição Araújo, ne’ebé iha 1999 tula jornalista Sander Robert Thoenes iha Hotel Turismo (atuál Novo Turismo) nia oin, iha tuku 17.30 lorokraik, haktuir sasin kona-ba saida mak sira ko’alia antes ba área Becora. Sasin-matan, Florindo da Coceição Araújo dadalia ho Sander Robert Thoenes;

“Ita-boot bele lori ha’u hale’u Sidade Dili?”

“La’e, ita-boot hakarak liuhusi ne’ebé?”

“Ha’u hakarak sai hosi iha ne’e, ita ba Becora, fila fali ba UNAMET (Balide)”.

“Agora Becora labele tama tanba iha ne’ebá ne’e nakonu ho militár Indonézia.”

“La’e, ita tenke ba Becora.”

Sira-na’in rua, Florindo da Conceição Araújo no Sander Tobert Thoenes,  sa’e motór-bebek ho marka “Astrea Grand” kór-mean ida, dolar tuir dalan naruk ba Becora. Iha kruzamentu Kuluhun nian, motorista Florindo hakarak hola rute liuhusi dalan Bemori-Taibessi-maka mosu iha Becora maibé Sander Robert Thoenes ne’ebé tuur iha kotuk la hatán—tenke liuhusi dalan-boot ba Becora. Tuur iha kotuk, Sander Robert Thoenes, kaer-bosok Florindo nia kbaas hodi dehan; “La’e, ita tenke hola liman-karuk ba kedas Becora,” dehan Sander Thoenes ho lian Maláiu.

Motorista Florindo fila ba liman-karuk tama ba Kuluhun, halo tuir Sander Thoenes nia hakarak. Tuir dalan, iha dalan ibun sira, nakonu ho militár Indonézia. Sira na’in rua la’o iha klaran ho kuidadu tebes. Matan hateke-na’uk ba ema sira ne’ebé hatais roupa makerek hanesan Toke ne’e, ho laran rua-rua.

To’o iha dalan klaran, sira-na’in rua hasoru konvoiu militár hosi Baucau ne’ebé akompaña refujiadu sira atu ba Timor-Osidentál.  Iha filleira oin, motorizada tolu halai iha oin, kesi ho bandeira Merah Putih iha ninia espellu.

“Ha’u haree ida ne’e, ha’u ta’uk! Ha’u fila motór halai fila. Iha kotuk, militár sira hahú tiru ami-na’in rua. Ha’u lori motór halai maka’as maibé motór halai neineik liu. Sira tiru ho raizada. Iha ha’u-nia laran, ha’u hamulak, ‘Ha’u-nia liman ne’e seidauk raan be, Maromak tulun ha’u ba!’ Nia tuur iha kotuk, tanba ema ne’e ain-aas ulun liu ha’u, entaun ha’u hateten ba nia. Ó-nia ulun iha ha’u-nia kbaas no hakuak ha’u metin. Mate ne’e, destiñu,” haktuir Florindo Conceição Araújo.

Haree ba kotuk, Florindo haktuir, motór tolu halai tuir sira-na’in rua ho tiru be la para. To’o iha aréa Igreja Becora nian, motór nia roda oin nakfera tanba hetan tiru. Motór halai, roda oin sabelok ba-mai de’it. To’o ikus ami-na’in rua monu iha dalan ninin. Lian hakilar ne’ebé ha’u rona hosi kotuk maka, “Kaer nia! Oho nia!” Ami na’in rua, ha’u ho Sander Robert Thoenes, ida-idak halai namkari hodi salva-án.

Iha biban ida ne’e, ha’u hamulak iha ha’u-nia laran; “Na’i, ita-boot taka tiha sira-nia matan ba! Akompaña ha’u ba! Sira labele haree ha’u para ha’u bele ba fatin ne’ebé ha’u atu ba.” Sira halai tuir no tiru nafatin maibé kala destiñu seidauk to’o, ha’u konsega halai ba to’o iha Hotel Turismo hodi hato’o informasaun kona-ba akontesimentu ne’e ba jornalista sira seluk ne’ebé hela iha otél refere.

“Iha Hotel Turismo, ha’u hasoru jornalista ida naran Jhon Martinkus no hateten ba nia. Ita-boot sira, se bele fó hatene ba forsa International Force for East Timor (INTERFET) sira ba Becora tanba imi-nia kolega ida ne’ebé  ohin ha’u tula ba ne’e, ema tiru ami rua, motór hotu rahun be, ha’u halai liu. Nia iha ne’ebá hela be, lahatene, nia moris ka mate. Di’ak liu forsa INTERFET ba para bele salva nia,” Florindo fó sasin.

Tanba, iha biban ne’ebá kalan demais ona entaun Jhon Martinkus hatán, “Ami jornalista, mate pasiénsia. Importante, ó maka labele mate.” Tanba transporte laek ona, Florindo hateten, entaun jornalista Jhon Martinkus tulun nia lori fila ba nia uma iha Ailok-Laran.

Entretantu, tuir relatóriu CAVR “Chega!”, faktu la halai sees hosi sá mak Florindo hateten. Relatóriu Chega! haklean liu-tan katak Sander Robert Thoenes mak jornalista Olandés ida ne’ebé militár hosi batalliaun 745 ne’ebé komanda hosi Tenente Camilo do Santos no Majór Jacob Djoko Saroso oho iha loron 21 setembru 1999, bainhira batalliaun ida ne’e retira hosi Munisípiu Lautém atu ba Timor Osidentál hafoin konsulta populár.

Jornalista Sander Robert Thoenes foin to’o iha Dili no halo hela kobertura, no atu fó reportajen kona-ba prezensa forsa internasionál INTERFET iha Timor-Leste ba “Financial Times”, maibé militár Indonézia tiru mate nia iha área Becora, besik Igreja Katólika Becora-Dili, maizumenus metru 300 hosi igreja refere.

Agus Mulyawan

Agus Mulyawan nu’udar Jornalista ida ne’ebé serbisu ba Ajénsia Notísia Asia Pers Internasional, ho baze iha Tokyo-Japaun, ne’ebé mate tanba oho hosi milísia Tim Alfa iha loron 25 setembru 1999, iha Apikuru-Verukoco, Lautém.

Grupu milísia ne’ebé lidera hosi Joni Márques oho Agus Mulyawan ho klero na’in lima (5) hanesan Madre Erminia Cazzaniga, Madre Celeste de Carvalho, Frater Jacinto Xavier, Frater Fernando dos Santos no seminarista Valério da Conceição, inkluindu Cristóvão Rudy Barreto, Titi Sandra Lopes no Izinho Freitas Amaral.

Entretantu, iha loron 26 agustu 1999, loron ikus bainhira pro-autonomia halo kampaña iha Dili, iha loron ne’e mak Polísia Indonézia hosi unidade BRIMOB halo intervensaun hodi apoiu pro-autonomia no tiru mate ema na’in 4 inklui jornalista–Ativista Bernardinho Joaquim Afonso Guterres, Membru RENETIL no Universitaríu hosi universidade Satya Wacana, iha Salatiga Indonézia. Durante 1999, Bernardinho Joaquim Afonso Guterres, hala’o kna’ar nu’udar jornalista ba Rádiu Matebian.

Jornalista: Cancio Ximenes

Editór: Xisto Freitas

Klik mós notísia iha kraik atu lee…

http://www.tatoli.tl/2019/06/rai-hun-mutin-sae-dadaun-ona/

http://www.tatoli.tl/2019/06/rai-hun-mutin-sae-dadaun-ona-ii/

http://www.tatoli.tl/2019/06/rai-hun-mutin-sae-dadaun-ona-iii/

http://www.tatoli.tl/2019/06/rai-hun-mutin-sae-dadaun-ona-iv/

http://www.tatoli.tl/2019/06/rai-hun-mutin-sae-dadaun-ona-v/

http://www.tatoli.tl/2019/06/rai-hun-mutin-sae-dadaun-ona-vi/

http://www.tatoli.tl/2019/06/rai-hun-mutin-sae-dadaun-ona-vii/

http://www.tatoli.tl/2019/06/rai-hun-mutin-sae-dadaun-ona-viii/

http://www.tatoli.tl/2019/07/rai-hun-mutin-sae-dadaun-ona-ix/

http://www.tatoli.tl/2019/07/rai-hun-mutin-sae-dadaun-ona-x/

 

 

 

 

 

 

HAKEREK NO HATÁN

Please enter your comment!
Please enter your name here