Sekretáriu Jerál FFTL, Nélio Isaac Sarmento. Imajen Tatoli/Egas Cristovão

DILI, 18 juñu 2019 (TATOLI)—Governu liuhosi Sekretaria Estadu Juventude no Desportu (SEJD), transfere ona subsídiu ba atleta prestadu sira iha eventu internasionál, maibé liuhosi konta bankária kada organizasaun.

“Subsídiu ba atleta sira ita transfere ona. La’ós transfere direta ba atleta sira-nia konta bankária, maibé liuhusi organizasaun,” Sekretáriu Estadu Juventude no Desportu, Nélio Isaac Sarmento, ko’alia ba Agência Tatoli iha edifísiu RTTL.ep, Caicoli, ohin.

Nia fó ezemplu, atleta hosi Federasaun Atletizmu, subsídiu sei haruka liuhusi konta bankária federasaun ne’e. Sira ne’ebé defisiente haruka ba Komité Paralímpiku Nasionál Timor-Leste (CPNTL-sigla portugés).

“Sira ne’ebé manán prémiu iha Tasa Hassanal Bolkiah ne’e ita tranfere ba Federasaun Futeból. Federasaun mak sei atribui prémiu sira ne’e ba atleta sira,” Nélio esplika.

Tuir nia, atleta sira ne’ebé hetan subsídiu hamutuk ho atleta prestadu sira hosi eventu Hasana Bolkiah nian hamutuk atleta na’in 30 mak sei simu subsídiu ne’e.

Governu liuhosi SEJD ne’e transfere ona orsamentu ba konta bankária kada organizasaun iha semana ida liu-ba. Nia dehan, atlteta hosi Atletizmu, Teófilo Freitas hetan osan rihun atus-ida ($100.000), maibé sira seluk hetan menus hosi ne’e.

Jornalista: Evaristo Soares Martins

Editór: Xisto Freitas

Lee mós notísia hirak ne’e: http://www.tatoli.tl/2019/05/atleta-teofilo-freitas-sei-simu-subsidiu-iha-tempu-badak/

http://www.tatoli.tl/2018/05/parabens-ba-kampeaun-tasa-hassanal-bolkiah/

http://www.tatoli.tl/2018/10/teofilo-dedika-medalla-osan-mean-ba-timor/

http://www.tatoli.tl/2019/06/cpntl-haruka-ona-karta-ba-sejd-prosesu-subsidiu-ba-atleta-prestadu/

HAKEREK NO HATÁN

Please enter your comment!
Please enter your name here