DILI, 24 juñu 2021 (TATOLI)—Líder Karismátiku, Kay Rala Xanana Gusmão, simu ona vasina Sinovac doze dahuluk no husu ema hotu-hotu hakbesik-an ba postu vasinasaun, nune’e simu vasina atu salva-an hosi surtu COVID-19.
“Husu ema ida-idak atu prevene-an hosi COVID-19. Ne’e duni, ha’u husu ba ema hotu-hotu atu hakbesik-an ba fasilidade saúde-sira hodi simu vasina,” Xanana Gusmão hateten ba jornalista-sira iha Maternidade Fatumeta, kinta ne’e.
Notísia relevante:Estudante-profesór rihun 30 simu ona Sinovac doze dahuluk
Xanana esplika, to’o oras-ne’e ema barak iha mundu mate tanba COVID-19 no ema millaun-resin mak infetadu, ne’e duni epela katak, dalan úniku atu liberta-an rasik, família no sosiedade maka simu vasina.
Iha fatin hanesan, Diretora Jerál Prestasaun Serbisu Saúde, Odete da Silva Viegas, agradese ba Kay Rala Xanana Gusmão, tanba simu ona vasina Sinovac doze dahuluk iha Klínika Fatumeta.
“Ami agradese ba Maun boot Xanana, tanba ohin dader bele mai simu ona vasina Sinovac iha Klínika ne’e. Ida ne’e hatudu ezemplu di’ak ba populsaun ne’ebé seidauk simu vasina, atu bele hakbesik-an ba postu vasinasaun iha ne’ebé de’it hodi hetan vasina,” Odete da Silva Viegas agradese.
Tuir observasaun, Xanana simu vasina iha tuku 08:30 otl, ne’ebé akompañadu hosi seguransa sira.
Jornalista: Felicidade Ximenes
Editór: Cipriano Colo