DILI, 02 dezembru 2020 (TATOLI)–Governu liuhosi Ministériu Solidaridade Sosiál no Inkluzaun (MSSI) iha semana ida liubá distribui ona osan pagamentu ba benefisiáriu reklamante sira iha territóriu Timor-Leste no semana kotuk Suku Caicoli konsege halo ona pagamentu ba reklamante sira.
Notisia Relevante: Xefe Suku Caicoli seidauk simu orientasaun kona-ba pagamentu reklamante
“Ami halo ona pagamentu ba reklamante subsídiu $200 hamutuk na’in-lima, iha semana kotuk maibé na’in-42 mak seidauk simu tanba naran sei prosesa hela iha Ministériu Administrasaun Estatál (MAE) no MSSI,” Xefe Suku Caicoli, Hipolito Marques Sarmento, hateten ba Agência TATOLI iha Sede Suku Caicoli, Postu Administrativu Vera-Crus, Munisípiu Dili, kuarta ne’e.
Xefe Suku ne’e hatutan, pagamentu refere autoridade komunitária Caicoli realiza iha Postu Vera-Cruz no naran labele taka sai tanba ema na’in-lima (5) de’it, nune’e halo autoridade komunitária ne’e halo kontaktu ba benefisiáriu mak simu.
Kona-ba naran benefisiáriu ne’ebé mak la taka sai, nia dehan, nia pate ho nia Xefe Aldeia sira halo ona aproximasaun ba MAE no MSSI.
“Ami konfirma ona naran reklamante ne’ebé la sai ne’e, ba MAE ho MSSI, no MSSI resposta katak sei iha tan faze daruak reklamante nian. Se autoridade komunitária mak la halo pagamentu ba reklamante ne’ebé naran sai ne’e, maka faze tuir sei laiha direitu ona atu simu,” nia dehan.
Tanba ne’e, parte suku hein de’it bainhira mak MSSI haruka tan lista reklamante seluk ne’ebé seidauk taka sai.
Tuir nia, hosi benefisiáriu na’in-42 ne’e, sei hein prosesu tuir mai tanba parte relevante sei halo prosesu hela, no bainhira mak fó sai ne’e autoridade komunitária sira labele hatene tanba kompeténsia ne’e iha MSSI nian.
Maibé nia fiar katak benefisiáriu na’in-42 ne’e sei iha opurtunidade ba daruak nian.
Jornalista: Osória Marques
Editór: Cancio Ximenes
