DILI, 12 agostu 2021 (TATOLI)—Kliente-sira husu serbisu notariadu, atu hadi’a mekanizmu atendimentu públiku, tanba kliente sira atu trata dokumentu ida de’it tenke forma ho liña naruk durante loron tomak iha loron manas.
“Ha’u atu renova billete identidade ne’ebé invalidu, maibé presiza hein oras barak nia laran tanba ema barak liu. Husu ministériu kompetente atu aumenta ema iha balkaun atendimentu iha rua ka tolu, hodi atende lalais,” Manecas de Jesus, hateten ba jornalista Agência Tatoli iha edifísiu notariadu Caicoli, kinta ne’e.
Notísia relevante:Notariadu presiza hadi’a servisu verifikasaun
Nune’e mós, Guilherme da Costa Mau, susjere ba ministériu kompetente katak, situasuan ne’e kleur oan, no agora kontinua aat liu tan.
“Tenke hadi’a situasaun ne’e, tanba ita ukun aan tinan barak ona. Ita presija Sistema atendimentu ida ne’ebé dignu ba povu ida ne’e,” nia sujere.
Hatán ba preokupasaun ne’e, Diretór Nasionál Serbisu Rejistu Nasionál (DNRN), Crisogno da Costa, rekoñese katak, iha kinta ne’e sidadaun barak mak forma atu trata dokumentu no iha de’it funsionáriu na’in-ida, maibé nia parte komunika kedan hodi aumenta pesoál balun ne’ebé reforsa duni atendimentu.
Nia mós klarfika katak, atendimentu loro-loron la’o normál, maibé ho serka sanitária ema barak la fila ba munisípiu, hodi trata dokumentu ho presiza urjente, nune’e ema tenke barak duni.
Normalmente sidadaun sira trata BI no revona loron ida bele foti kedan, maibé karik sistema avaria mak lori loron rua.
Oras ne’e daudaun serbisu notariadu nasionál estoke iha blanku BI rihun 30, hodi atende sidadaun-sira.
Jornalista: Nelson de Sousa
Editór: Cipriano Colo