Prezidente interinu PATIFOR, Gregório Saldanha. Imajen Tatoli/Egas Cristovão

DILI, 02 fevereiru 2021 (TATOLI)-Prezidente interinu Partidu Timor Forte (PATIFOR), Gregório Saldanha, husu ba Ministériu Justisa (MJ) liuhosi Diresaun Nasionál Servisu Rejistu Notariadu atu hadi’a servisu  verifikasaun (autentikasaun) ba kandidatu partidu foun ne’ebé hatama pedidu inskrisaun.

Liuhosi konferénsia imprensa, tersa ne’e, iha sede PATIFOR, Faról, Dili, Prezidente interinu PATIFOR, Gregório Saldanha, aprezenta nia lamentasaun kona-ba servisu Rejistu Notariadu tanba durante prosesu triajen iha fulan tolu nia laran  la notifika PATIFOR hodi hadi’a kedas sala ne’ebé iha no ikus mai Tribunál Rekursu (TR) maka tenke hala’o fali kna’ar ida ne’e hodi deteta falta sira.

Notísia Relevante : PATIFOR sei kompleta rekizitu

“Husu Notariadu atu servisu ho seriedade, responsabilidade, imparsialidade, profisionalizmu no transparénsia, hodi nune’e la bele prejudika sidadaun sira-nia direitu síviku atu harii partidu polítiku, hodi kontribui mós ba dezenvolvimentu,” Gregório Saldanha hateten.

Nia konsidera verifikasaun ne’ebé mak kandidatu partidu foun inklui PATIFOR hatama pedidu inskrisaun ba Notariadu la ho verifikasaun ho didi’ak, nune’e labele deteta buat ruma hodi notifika parte sira, maibé ba iha Tribunál Rekursu (TR) mak foin deteta fila-fali rekizitu balun seidauk kumpre.

Hatán ba preokupasaun ne’e, Diretór Jerál Diresaun Jerál Servisu Rejistu no Notariadu, Crisogno da Costa Neto, esplika iha lei partidu polítiku, lei númeru 2/2016 3 fevereiru, primeira alterasaun ba lei númeru 3/2004 14 abríl, Ministériu Justisa, liuhosi Diresaun Jerál Servisu Rejistu Notariadu ninia kna’ar mak atu halo autentikasaun ba dokumentu pedidu inskrisaun partidu foun sira.

Nia fó ezemplu partidu ida iha apoiante 20.000, mai ho kartaun eleitorál parte Notáriu autentika hodi tau karimbu bainhira identifika kartaun ruma iha duplikasaun no partidu sira ninia apoiante iha kada munisípiu la to’o 1.000, ida ne’e sei rekomenda de’it ba Tribunál Rekursu (TR) mak sei deside.

“Autentikasaun ne’e atu haree ba iha dokumentu sira tuir ona orijinál inklui dokumentu sira seluk ami so tau de’it karimbu atu kompleta ka la kompleta ne’e la’ós ami nia kompeténsia, maibé ida ne’e ikus liu Tribunál Rekursu mak deside,” Gregório Saldanha hateten.

Nia informa, bainhira simu pedidu inskrisaun nafatin husu ba partidu sira atu kumpre lei partidu polítiku númeru 13 kona-ba rekizitu sira atu bele kompleta.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here