DILI, 14 janeiru 2021 (TATOLI)--Governu hahú planeia ona atu halo revizasaun ba medida Ezekusaun Estadu Emerjénsia (EE) da-siak hodi fó flesibilidade movimentasaun tanba kazu konfrimandu hahú menus, hosi kazu 18 iha fulan dezembru 2020, agora kuaze rekuperadu no falta neen mak pozitivu.
“Ami atualiza situasaun Estadu Emerjénsia liga ho COVID-19 ba Prezidente Repúblika tanba dadaun ita iha kazu konfirmadu positivu redús ba ema na’in-neen, entaun Governu haree atu oinsá mak halo revizaun ba medida atu fleksibiliza atividade bele la’o normál fali,” Primeiru Minsitru, Taur Matan Ruak, informa hafoin enkontru semanál ho Prezidente Repúblika, Francisco Guterres Lú Olo , iha Palásiu Prezidensiál, kinta ne’e.
Notísia Relevante: EE da-siak: viola medida ezekusaun sei asume responsabilidade kriminál
Tuir dadus ikus COVID-19 hosi Ministériu Saúde, kazu komulativu hamtuk 51, kazu foun rua, rekuperadu foun ida, rekuperadu 49 no pozitivu no baixa iha sala izolamentu hamutuk neen.
EE iha faze da-siak abranje territóriu nasionál tomak no hahú vigora hosi tuku 00:00 loron 03 janeiru 2021 to’o tuku 23:59 loron 01 fevereiru 2021.
Maski, nune’e Xefe Governu kontinua enkoraja sidadaun sira atu kumpre regra sira hanesan distánsia sosiál, uza máskara hodi prevene kontájia pandemia COVID-19.
Iha finál tinan 2020, númeru positivu COVID-19 sa’e ba na’in-18, ne’ebé na’in-tolu tama ilegalmente, maibé hahú menus.
Kona-ba vasina AstraZeneca, PM afirma, daudaun ne’e harii ona komisaun interministeriál ida ho komisaun téknika ida atu prepara planu vasinasaun .
Komisaun interministériál ne’e sei lidera hosi Vise Primeiru-Ministru no Ministra Solidaridade Sosiál no Inkluzasaun, Armanda Berta dos Santos.
“Sira sei haree preparativa hotu to’o implementa vasina ne’e, saida mak ita presiza halo entaun kuandu to’o tempu ita-nia sidadaun sira hotu sei hatene,” Eis Prezidente Repúblika ne’e akresenta.
Jornalista: Florêncio Miranda Ximenes
Editora: Julia Chatarina
