DILI, 11 jullu 2022 (TATOLI)—Governu liuhosi Ministériu Solidariedade Sosiál no Inkluzaun (MSSI), segunda ne’e, asina nota entendimentu ho ajénsia pagamentu Fintech T-pay no BNCTL ba programa “bolsa da mãe jerasaun foun” iha Dili.
Notísia Relevante: Benefisiáriu 4.000 rejistu ona ba programa “bolsa da mãe jerasaun foun”
Diretór Ministériu Solidariedade Sosiál no Inkluzaun (MSSI), Florencio Pina Dias Gonzaga ho Diretór Jerál Finansa no Administrasaun, Rui Manuel Exposto Gago, reprezenta Ministériu Solidaridade Sosiál no Inkluzaun asina karta entendimentu ho ajénsia pagamentu Fintech T-pay no BNCTL ba programa bolsa da mãe jerasaun foun.
“Asinatura akordu ida-ne’e nu’udar pasu ba ofisialmente halo kooperasaun lejítima ho BNCTL no T-PAY nu’udar parseiru. Hodi nune’e, fasilita pagamentu transferénsia osan ba benefisiáriu programa bolsa da mãe jerasaun foun iha munísipiu Ainaro, Bobonaro no RAEOA,” Diretór Ministériu Solidariedade Sosiál no Inkluzaun (MSSI), Florencio Pina Dias Gonzaga, hateten ba jornalista sira, iha MSSI Caicoli, segunda ne’e.
Diretór Jerál MSSI, Florencio Pina Dias Gonzaga, hateten benefisiáriu inan isin-rua sei simu $15 kada fulan, labarik tinan tolu (3) mai kraik sei simu $20 kada fulan no suplementu adisionál $10 ba labarik ho Defisiénsia to’o sira atinje tinan neen (6).
“Ita alista ona benefisiáriu hotu-hotu hodi haruka ba BNCTL hodi prepara sira-nia konta bankária no lista benefisiáriu ba T-PAY atu bele hahú prepara ba pagamentu. Segundu, ho akordu ida-ne’e BNCTL iha lejitimidade ba pagamentu ba benefisiáriu iha área kobertura sira-nian,” nia dehan.
Nia dehan, to’o ohin loron totál aplikante ne’ebé mak rejista ona ba programa Bolsa da Mãe Jerasaun Foun iha Munisípiu Ainaro, Bobonaro no RAEOA hamutuk 6,037.
Aplikasaun hirak ne’ebé mak aprovadu ona liuhusi prosesu verifikasaun mak aplikante sira-ne’ebe rejistu hahú hosi 17-30 juñu no sei simu pagamentu dahuluk iha fulan-jullu.
“Iha tempu badak Governu sei halo lansamentu pagamentu dahuluk ba benefisiáriu sira. Benefisiáriu hirak ne’ebé mak hetan ona aprovasaun sei hahú hetan pagamentu liuhosi ajénsia pagamentu BNCTL no ka Fintech T-pay,” nia dehan.
Aleinde subsídiu osan kada fulan, programa Bolsa da Mãe Jerasaun Foun mós fornese akonsellamentu kona-ba saúde ousi pesoál saúde sira kona-ba kuidadu saúde durante peródu isin-rua, periódu primeira infánsia inklui imunizasaun, nesesidade hahán nutritivu ba família no prátika ijéniku no sanitasaun.
Bolsa da Mãe Jerasaun Foun mak programa transferénsia osan ne’ebé estabelese ho Dekretu-Lei númeru 22/2021, loron 10 Novembru. P
rograma ida-ne’e sei hala’o iha Timor-Leste ho fazeadamentu, hahú hosi Munisípiu Ainaro, Bobonaro no RAEOA iha tinan 2022 no kontinua ba territóriu tomak iha tinan hirak tuir mai.
Jornalista : Osória Marques
Editór : Cancio Ximenes
