Aban, PN diskute pedidu autorizasaun PR Horta vizita Indonézia
DILI, 06 jullu 2022 (TATOLI)—Sekretária Meza Parlamentu Nasionál, Lídia Norberto, informa reuniaun lidér bankada deside, kinta (07/06) aban, sei realiza reuniaun plenáriu extraordináriu hodi diskute pedidu autorizasaun Prezidente Repúblika (PR), José Ramos Horta, atu vizita Indonézia.
Notísia Relevante: PR Horta hato’o karta pedidu autorizasaun ba PN atu vizita Indonézia
“Ohin reuniaun lidér bankada deside aban sei iha reuniaun plenáriu extraordináriu ida hodi ko’alia kona-ba autorizasaun Parlamentu Nasionál nian ba Prezidente Repúblika ne’ebé mak halo vizita Estadu ida ba Indonézia,” Sekretária Meza PN, Lídia Norberto, hateten ba jornalista sira hafoin partisipa reuniaun lidér bankada iha sala konferénsia PN, kuarta ne’e.
Reuniaun lidér bankada ne’ebé lidera hosi Prezidente Parlamentu Nasionál, Aniceto Longuinhos Guterres Lopes, informa mós ba bankada parlamentár sira katak iha vizita Prezidente Repúblika nian ne’e halo mós konvite mai PN, atu bele nomea reprezentante bankada parlamentár ida-idak hodi bele inklui tama iha delegasaun Xefe Estadu ba iha Indonézia.
“Ohin lidér bankada sira hotu hetan ona informasaun hosi Prezidente Parlamentu no sira sei ba bankada ida-idak hodi haree oinsá responde ba kestaun ne’e,” nia dehan.
Sekretária Meza ne’e hateten, vizita Xefe Estadu nian ne’e iha nesesidade tanba iha artigu 8 konstituisaun RDTL katak Prezidente Repúblika iha kompeténsia ba relasaun internasinál.
“Ne’e signifika iha nesesidade buat ida sentidu Estadu tenke tau iha oin. Kualkér Prezidente Repúblika kuandu viajén ba rai-liur ne’e la’ós nia hakarak maibé ne’e kompromisu Estadu nian. Mezmu ita-boot sira (jornalista) haree ona anteriormente iha buat ida halo fora do normál tan de’it kestaun seluk maibé agora postura muda,” nia hateten.
Tuir Konstituisaun Repúblika Demokrátika Timor-Leste (KRDTL) iha artigu 95 (Kompeténsia Parlamentu Nasionál) iha númeru 3 “h” hateten katak Parlamentu Nasionál mak fó autorizasaun ba Prezidente Repúblika atu hala’o vizita Estadu nian.
Tan ne’e, liuhosi reuniaun plenáriu extraordináriu mak sei deside konsentimentu ka autorizasaun hosi Parlamentu Nasionál ba vizita PR nian.
Notísia Relevante: PR Horta konsidera vizita bá Indonézia di’ak ba Timor-Leste
Jornalista : Nelson de Sousa
Editór : Cancio Ximenes
