PN sujere MS rekruta pesoál saúde presta servisu iha COVID-19 sai permanente
DILI, 05 jullu 2022 (TATOLI)—Membru Parlamentu Nasionál (PN) hosi bankada KHUNTO, Deputada Irene Gonzaga, sujere ba Ministéiru Saúde (MS) atu rekruta pesoál saúde ne’ebé durante ne’e ministéiru kontrata presta servisu iha ambitu COVID-19 sai permanente.
Notísia Relevante: Pesoál saúde 46 iha Covalima nia kontratu sei ramata
“Husu ba Ministéiru Saúde, hanesan iha 30 jullu foin lalais ne’ebé komesa hapara ona ita-nia pesoál saúde sira-ne’ebé fó kontratadu hanesan médiku jerál, parteira, infermeiru durante fó apoiu tebes iha tempu COVID-19 no dengue maibé agora daudaun ministéiru hahú hapara tiha ona. Ha’u hanoin nusa mak la halo rekrutamentu ida, ita rekruta funsionáriu ba pesoál saúde sira ne’e sai funsionáriu permanente, atu nune’e sira bele servisu di’ak liután,” Deputada Irene Gonzaga levanta iha reuniaun plenária, tersa ne’e.
Tan ne’e, presiza kria fatin di’ak ba sira hodi halo rekrutamentu ida hodi dezloka sira ba iha fatin komunidade presiza tebes hanesan iha suku sira, tanba durante ne’e Deputadu sira kestiona hela fatin barak mak laiha pesoál saúde iha postu saúde.
“Maibé ministéiru la haree ba ida-ne’e hapara fali ita-nia ema. Hanoin ministéiru so presiza sira iha de’it tempu urjente maibé liu tiha ona, husik sira sai abandona. Hanoin ida-ne’e ladún di’ak,” nia preokupa.
Iha parte seluk, Deputada hosi bankada Governu ne’e husu MS atu kontinua hala’o fumigasaun hodi prevene moras dengue tanba daudaun ne’e udan komesa monu rai tan fali ona..
Hatán ba kazu dengue, Governu liuhosi Ministru ba Asuntu Parlamentár no Komunikasaun Sosiál (MAPKOMS), Francisco Martins Pereira Jerónimo, hateten Governu rejista maibé husu ba komunidade hotu iha konsiénsia di’ak atu kuidadu ita-nia areadór sira.
“Labele so’e fo’er arbiru tanba moras dengue mai hosi problema ne’ebé bee nalihun iha ita-nia uma sorin-sorin.Ita-nia bee iha tanke bee nian la haree, entaun dalaruma provoka susuk barak iha ne’eba afeta mós ba moras dengue,” nia dehan.
Nune’e fó hanoin atu iha konsiénsia no parte Governu sei kontinua halo nia servisu rezolve problema sira ho di’ak.
Enkuantu, Governante ne’e hateten relasiona ho pesoál saúde kontratadu tanba rekrutamentu ne’ebé halo ba sira atu halo prevensaun ba COVID-19 ho kontratu la’ós permanente.
“Agora COVID-19 laiha ona, sira tenke ramata duni haree fali servisu seluk ne’ebé mak atu fó fali ba sira. Tanba ne’e, kontratu para lai hodi haree fali ba atividade sira-ne’ebé presiza fali maibé ida-idak mai ho nia kualifikasaun mós. Ne’e mak ministéiru halo la’ós tuur-tuur hapara de’it ida-ne’e, lae. Tanba kontratu ba tinan ida no fulan neen, moras COVID-19 agora hotu ona la’ós 100% maibé la’ós kazu boot hanesan uluk, entaun sira hetan kontratu agora la servisu ona ne’e, bele para,” nia dehan,
Nia dehan, Ministéiru Saúde iha problema ida liu-liu tanba servisu sira-ne’ebé lao iha postu saúde iha suku sira dalabarak profisionál saúde to’o tiha iha ne’eba, fulan ida ka to’o tolu sira sente hanesan dook hosi sidade ka kondisaun ladún di’ak, entaun sira husu atu muda fali postu administrativu no munisípiu.
“Entaun, ida ne’e mak difikulta fali Governu foti desizaun. Tanba ne’e, dalabarak ami ba iha suku dehan iha suku ne’e oan rasik hanesan infermeira, médiku jerál di’akliu kontratu sira fasil hodi hela iha ne’eba ho sira-nia kondisaun hodi hala’o servisu di’akliu,” nia hateten.
Tan ne’e, preokupasaun Deputadu sira-nian parte Governu rejista sei informa ba Ministra Saúde atu haree fila-fali kondisaun seluk. Karik iha rekrutamentu seluk sei loké fila-fali tanba sei presiza nafatin pesoál saúde iha territóriu hodi fó asisténsia ba komunidade.
Jornalista : Nelson de Sousa
Editór : Cancio Ximenes
