iklan

EKONOMIA, HEADLINE

AIFAESA identifika empreza inklui na’an tasak iha produtu Cesta Bázika

AIFAESA identifika empreza inklui na’an tasak iha produtu Cesta Bázika

Inspektór Jerál AIFAESA, Ernesto Monteiro. Imajen Tatoli/Francisco Sony

DILI, 27 juñu 2022 (TATOLI)–Inspetór Jerál Autoridade Inspesaun no Fiskalizasaun Atividade Ekonómika, Alimentár no Sanitária, Institutu Públiku (AIFAESA, I.P), Ernesto Monteiro, hateten durante monitorizasaun no inspesaun ba distribuisaun Cesta Bázika faze daruak, nota katak empreza balun inklui na’an tasak.

“Ami halo inspesaun ba programa Cesta Bázika ho tipu rua hodi haree ba kualidade produtu no kuantidade. Kualidade produtu ne’ebé ami haree ho matan di’ak, maibé iha balun mak ladún di’ak durante distribuisaun foin lalais iha aldeia Baia-Leste, balun iha na’an matak no balun tasak ona. Entaun ida tasak ona ne’e tuir loloos labele,” Inspetór Jerál informa ba Agência Tatoli, iha ninia knaar fatin, Matadoru, segunda ne’e.

Notísia relevante: Governu lansa distribuisaun Cesta Bázika faze daruak iha aldeia Baia Leste

Ho ida-ne’e, Inspetór Jerál husu ba empreza ne’ebé fahe tenki atensaun no tau loron produsaun nune’e bele asegura kualidade.

“Ami identifika sira uza na’an tasak, entaun ami husu katak kuandu na’an tasak ona ne’e horibainhira nian, kleur demais labele. Ho kestaun ne’e momentu ne’ebá ami sujere katak pelu menus loron produsaun na’an tenki tau atu bele asegura kualidade ba oin, entaun sira rona duni ami-nia sujestaun,” nia akresenta.

AIFAESA prontu atu halo verifikasaun filafali ba sasán sira ne’ebé fahe bainhira komunidade la satizfeitu kona-ba kualidade no kuantidade rasik.

“Kona-ba kuantidade ami haree di’ak tanba iha prosesu distribuisaun ami rasik lori tetu hodi tetu produtu sira ne’e, ne’ebé ami halo ida-ne’e tuir duni saida mak prevee iha baze legál. Aleinde ne’e mós presu ba produtu sira ne’e loos no tuir duni saida mak estabelese ona,” Inspetór Jerál tenik.

AIFAESA mós nota katak produtu ne’ebé uza produtu lokál bazeia ba rezolusaun Governu ne’ebé estabelese katak 75% produtu lokál, maibé nafatin preokupa ho produsaun rai-laran ne’ebé karik la sufisiente.

“Osan ne’ebé prevee ba Cesta Bázika millaun $80 ne’e osan boot, hosi ne’e 75% tenki mai hosi produtu lokál, maibé ha’u rasik ko’alia ho Ministériu Agrakutura no Peska (MAP) atu haree ba foos, ha’u-nia haree produtu rai-laran la sufisiente no sei la tuir alvu 75%. Ha’u ko’alia tanba ha’u rasik ba haree iha armazen Sentru Lojíztika Nasionál (CLN, sigla portugés) iha Baucau no Tibar, haree ba la barak,” nia dehan.

Nune’e, nia sujere ba ministériu implementadór katak tanba programa ne’e motiva agrikultór sira, maka tenki uza hotu tiha produtu rai-laran maka implementadór sira bele halo importasaun.

Ministériu implementadór  ba Cesta Bázika faze daruak ne’e maka Ministériu Turizmu Komérsiu No Indústria (MTKI) ho totál kustu millaun $40 no Sekretaria Estadu Kooperativa (SEKoop) ho totál kustu millaun $40.

Produtu ne’ebé admite ba programa ne’e mak hanesan produtu ai-han ne’ebé iha karboidratu, proteína no vitamina inklui sasán ijiene pesoál no ijiene fememinina.

Cesta Bázika faze ne’e fixa ho montante $50 ba kada ema hosi membru agregadu familiár benefisiáriu ne’ebé ho rendimentu mensál boot liu $500, enkuatu antes ne’e sidadaun iha territóriu laran sai benefisiáriu ba Cesta Bázika faze dahuluk.

Jornalista  : Antónia Gusmão

Editora      : Julia Chatarina

iklan
iklan

Leave a Reply

iklan
error: Content is protected !!