Emprezáriu lokál iha munisípiu Baucau partisipa semináriu ne’ebé realiza hosi BNCTL, iha salaun Canosiana, Vila Antiga, sesta (24/06). Imajen Tatoli/Natalino Belo.

BAUCAU, 24 juñu 2022 (TATOLI) – Banku Nasionál Komérsiu Timor-Leste (BNCTL, sigla portugés) sesta ne’e, realiza semináriu hodi kompromete no prontu atu apoia kréditu ba emprezáriu lokál iha Baucau atubele investe setór produtivu, maibé apoia kréditu nian tenke tuir regra banku nian.

Prezidente Konnsellu Administrasaun BNCTL, António F. Victor, esplika, Banku Nasional Komersiu Timor-Leste realiza seminariu ho objetivu kona-ba planu negósiu hodi rona ideia no sujestaun hosi setór privadu sira nune’e bele hadi’a prestasaun serbisu ba públiku.

“Ami hakarak rona ideia no sujestaun hosi ita-nia setór privadu sira nune’e bele hadi’a prestasaun serbisu ba publiku di’akliu iha futuru tanba nee ami prontu apoia tuir regra banku nian,” nia hateten iha Vila Antiga.

BNCTL iha ona kapasidade atu fó kréditu miliaun $200 ba emprezáriu sira hodi investe iha setór produtivu ne’ebé sustentável atu hadi’a dezenvolvimentu ekonómiku no kria empregu ba timor oan sira.

Prezidente Autoridade Munisípiu (PAM) Baucau, Olívio ‘Bou-Lesa’ Freitas hateten governu lokal iha polÍtika atu hadi’a dezenvolvimentu liuhosi apoia iha setór produtivu sira nunee kontirubui ba sustentabilidade ekonomia lokál.

“Autoridade Baucau iha polítika kontinua fó apoiu ba setór produtivu hotu-hotu nune’e ita nafatin fortifika sustentabilidade ita-nia ekonomia rai laran,” Bou-Lesa akresenta.

Na’in ba kompañia ACELDA, Higino da Costa Freitas, hateten, dezenvolvimentu setór agrikultura ne’e importante tamba sai hanesan xave ba dezenvolvimentu ekonomia lokal.

“Durante ne’e ha’u hetan apoiu kréditu hodi halao atividade empreza nian iha área agrikultura tanba setór agrikultura hanesan setór xave ka ís nasaun nian,” Higino hateten.

Jornalista  : Natalino Belo 

Editór        : Evaristo Soares Martins 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here