CNC disemina informasaun kona-ba implementasaun rekomendasaun sira hosi relatóriu CAVR "Chega!" no CVA "Per Memoriam Ad Spem" ba PNT) munisípiu Dili. Imajen/Hristo Alves dos Santos

DILI, 23 juñu 2022 (TATOLI)– Centro Nacional Chega, Institutu Públiku (CNC,I.P), kinta nee’, hala’o diseminasaun kona-ba implementasaun rekomendasaun sira hosi relatóriu CAVR “Chega!” no CVA “Per Memoriam Ad Spem” ba  Polisia Nasional Timor-Leste (PNTL) munisípiu Dili. 

Membru PNTL ne’ebé partisipa iha diseminasaun ne’e hamutuk 75, kompostu hosi membru forsa rezerva, membru Eskuadra PNTL sira, membru tránzitu.

Objetivu diseminasaun informasaun relatóriu “Chega” ba membru PNTL to’o ofisial-sira atu  hakribi violensia kontra direitu umanu ba povu Timorense.

“Durante ne’e,  sira halo arkivu dokumentu hodi prezervasa memoria iha pasadu, entaun ho aprezentasaun ida ne’e membru PNTL foun sira bele hatene, dalaruma sira halo servisu iha terenu bele konsidera ba direitu umanu, entaun ho ida ne’e bele loke hanoin bainhira halo atuasaun forsa ruma iha terenu respeitu nafatin ba direitu umanu ba sidadaun hotu nian,” Komandante PNTL Munisípiu Dili, Superintendete Xefe, Henrique da Costa, hateten iha Caicoli, kinta ne’e.  subliña.

Nia dehan, atividade diseminasaun ne’e ho baze ba despaisu hosi Komandante Jerál, liuhosi pedidu hosi Diretór Ezekutivu CNC, atu mai fahe informasaun kona-bá rekomendasaun relatóriu CHEGA ninian mai iha Komandu PNTL Munisipiu DIli.

“Ho informasaun hirak hosi CNC ne’e, membru PNTL sira bele hatene no akompaña kona-ba prosesu tomak iha prosesu luta ba independensia ukun rasik-an nian nomos violasaun diretu umanu ne’ebé maka akonstese iha Timor-Leste,” nia afirma.

Iha okajiaun ne’e, Komandante Henrique, lori estrutura PNTL tomak agradese ba ekipa hosi CNC nian ne’ebe fahe informasaun ba PNTL DIli no nia husu atu bele kontinua iha futuru ba  Komandu PNTL munisipiu seluk hodi bele hetan mos informasaun hanesan.

Iha biban ne’e, Diretór Ezekutivu CNC, Hugo Maria Fernandes, hateten objetivu CNC halo diseminasaun ne’e,  hodi responde ba rekomendasaun hosi relatóriu Chega ne’ebe tuir dekretu lei CNC nian,  hodi hasae koñesementu hosi entidade hotu atu hatene kona-ba violasaun Direitu umanu ne’ebe akontese iha pasadu.

“Liu hosi sensibilizasaun ne’e, ita fó hatene ba sira (PNTL) hotu labele repete tan aktu kontra direitu umanu ba komunidade sira hanesan tempu uluk luta. Ita hein liu hosi dezeminasaun informasaun bele konsensializa institusaun PNTL liuliu membru tenke hakribi violénsia direitu umanu”, Diretór Ezekutivu ne’e akresenta.

Iha atividade diseminasaun informasaun kona-ba relatoriu Chega! No Komisaun Verdade no Amizade (Sigla portugés; CVA) ne’e, loke mós filme dokumentasaun kona-bá trajedia sira ne’ebe akontese durante invazaun Indonézia nian iha tinan 24 nia laran, liu-liu kronolojia istória 1974-1999.

Jornalista: Natalino Costa

Editór       : Florecio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here