VIQUEQUE, 22 juñu 2022 (TATOLI)—Organizasaun Naun Governamentál K’nua Haberan Komunidade (KHK) munisípiu Viqueque, kuarta ne’e, apoia ortikultura ba grupu Luru-Boro hosi aldeia Luru-Boro, suku Macadique, postu administrativu Uatulari, munisípiu Viqueque hodi hasa’e produtividade.
“Ha’u sente kontente bainhira grupu Luru-Boro mosu ona, maibé ha’u husu grupu ne’e tenki la’o ba oin. Grupu ne’e ho atividade ortikultura kuda kanku no rai osan, ne’ebé K’nua Haberan Komunidade apoia materiál. Osan ba imi tenki jere ho di’ak hodi habelar no hakbiit imi-nia ortikultura no rai osan,” Administradór postu Uatulari, Maunel do Rosário, informa ba Agência Tatoli, hafoin ramata distribui materiál ba grupu Luru-Boro, iha suku Macadique.
Notísia relevante: KHK no komunidade suku Uma-Quic Viqueque kuda ai-oan 1.000
Nune’e, Autoridade postu ne’e husu ba grupu atu aumente atividade sira seluk hanesan soru tais, hakiak ikan, hakiak manu no seluk tan.
“Ha’u husu ba grupu Luru-Boro tenki kria estrutura grupu hodi lori ba administrasaun postu Uatulari, nune’e iha kualker reuniaun ruma ema husu karik, ha’u bele aprezenta. Se la’e ha’u la hatene buat ida. Agradese ba K’nua Haberan Komunidade ne’ebé fó ona apoiu materiál ba grupu sira hodi haboot sira-nia atividade ortikultura, nune’e fó rendimentu no uza ba sustenta família sira iha uma-laran no selu oan sira ba eskola,” nia akresenta.
Iha fatin hanesan, Diretór Ezekutivu KHK, Agosto Pinto, haktuir, apoiu materiál sira-ne’e fundasaun KHK hetan hosi parseiru internasional ZIT Alemaña hodi fó ba grupu Luru-Boru uza ba atividade ortikultura no apoia orsamentu ho totál $500 hodi haforsa grupu.
“Daudaun ne’e ami apoia grupu sira iha postu haat hanesan Viqueque vila, Ossu, Lacluta no postu Uatulari. Sasán sira-ne’e hosi ami-nia parseiru ZIT ne’ebé liuhosi programa ida ami hanaran ‘Muda ó ninia hahalok’. Objetivu atu ba joven sira atu muda hanoin tanba dala ruma hanoin hein de’it Governu mak kria kampu serbisu ba ita, maibé Governu seidauk iha kbiit. Entaun ita halo uluk maka hein tan Governu sira bele kontribui,” nia dehan.
Diretór Ezekutivu husu ba autoridade sira presiza buka dalan ba grupu hodi grupu sira bele moris liután. KHK apoia materiál agrikultura ba grupu sira hodi fasilita sira hodi hala’o serbisu ho di’ak.
Nune’e mós, Koodenadór grupu Luru-Boru, Matias da Costa, apresia ho inisiativa KHK ne’ebé fó apoia materiál hodi fasilita grupu hala’o serbisu ortikultura atubele hasa’e produtividade grupu nian.
“Ami sente kontente no agradese ba KHK ne’ebé fó ona apoia materiál ba ami, daudaun ne’e ami-nia grupu kuda kanku, fore talin, tomante no modo ho medida rai 40×40. Liuhosi apoia ida-ne’e ami bele hasa’e produtividade grupu no apoia ne’e ami foin hetan dahuluk,” nia tenik.
Grupu Luru-Boru harii iha tinan 2022, ho membru hamutuk na’in-23, ho ninia atividade hanesan ortikultura no rai osan iha foho Luru-Boru, maski nune’e dalan liga bá fatin halo atividade grupu mak a’at hodi difikulta ba movimentu grupu hodi lori produtu ba merkadu.
Materiál ne’ebé ong KHK apoia ba grupu Luru-Boru maka hanesan jeradór bee ida, tanki ida, redi taka modo tolu, mageira rua, ensada, ai-suak, fini modo musan no osan ho montante $500.
Distribui materiál agrikultura ne’e entrega direta hosi administradór postu Uatulari no Diretór Ezekutivu KHK ofisialmente entrega ba grupu Luru-Boru.
Jornalista : Vitorino Lopes da Costa
Editora : Julia Chatarina
