Imajen/BTL,E.P

COVALIMA, 22 juñu 2022 (TATOLI)–Ekipa Bee Timor-Leste Empreza Públiku (BTL, E.P) Covalima identifika komunidade iha suku Camanasa no Suai Loro, iha postu administrativu Suai Vila, munisípiu Covalima, seidauk asesu bee-moos.

“Ami-tun ba iha terenu hodi identifika katak komunidadene’ebé mak durante ne’e la asesu bee-moos mak hanesan iha suku Camanasa no Suai Loro. Ami sei haree no halo mudansa ba kanalizasaun bee-moos iha postu Suai Vila hodi kobre área sira-ne’ebé seidauk asesu ba bee-moos ne’e,” Koordenadór BTL, E.P Covalima, Castro Dody Ramos, informa ba Agência Tatoli, iha nia servisu fatin, kuarta ne’e.

Tuir mapeamentu hosi BTL, E.P katak komunidade iha área urbana, ne’ebé seidauk asesu bee-moos mak hanesan Suku Camanasa iha aldeia Fatu-isin, Manekin no Ailok-Laran, no   suku Suai Loro hanesan iha aldeia Lo’o, Loro, Mane-ikun no Sukabi-laran bele kobre hotu.

“Iha área urbana bazea planu mestre tuir débitu bee atu kobre tan mak suku Camanasa no Suai Loro de’it. Ita sei halo estudu tan, nune’e ita fornese bee-moos ba komunidade ho durasaun tempu naruk,” nia hateten.

Tanba ne’e, hein de’it planu mestre ne’ebé sei dada bee-moos hosi postu administrativu Fohorem mai iha área urbana nian, tanba planu mestre ne’ebé la’o hela to’o ona iha faze Detail Engenering Dezain (DED) hein atu loke konkursu ba kompañia sira kompete iha konkorsu públiku.

Xefe SukuCamanasa, Samuel Barros, hateten durante komunidade iha Suku Camanasa hanesan  iha  aldeia Fatu-isin , Manekin no Ailok Laran konsumu de’it bee posu no bomba.

“Ha’u-nia komunidade aldeia tolu ne’e maioria mak la asesu bee-moos, sira asesu de’it bee posu ne’ebé antigu no bomba. Tanba ne’e, provizóriu, ha’u sei orienta ba xefe aldeia sira atu foti dadus, foin lalais ekipa BTL, E.P Covalima halo ona konfirmasaun ho ha’u,” nia dehan.

Nia esplika, bee parte iha eskola EBF Ailok-laran ne’e antigu hanesan komunidade iha aldeia Fatu-Isin uza bee bomba ne’ebé agora avaria ona no komunidade konsumu de’it bee posu. Maske sira asesu duni bee ne’ebé distribui hosi BTL, E.P maibé sira kuru dook uitoan iha aldeia Manekin iha bee bomba tolu ne’ebé Programa Nasional Dezenvolvimentu suku (PNDS), halo reabilitasaun durante sira uza.

Enkuantu populasaun iha aldeia tolu mak hanesan aldeia Fatu-Isin hamutuk 1345 ne’ebé iha xefe família 344, populasaun aldeia manekin hamutuk 1138 ho xefe família 294, aldeia Ailok Laran hamutuk 1095 ho xefe família 282.

Jornalista : Celestina Teles

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here