Vise-Ministra Solidariedade Sosiál no Inkluzaun, Signi Chandrawati Verdial. Imajen/Nelson de Sousa.

DILI, 21 juñu 2022 (TATOLI)—Vise Ministra Solidariedade Sosiál no Inkluzaun (MSSI), Signi Candrawati Verdial, hateten MSSI iha faze planeamentu sei harii Konsellu Nasionál atu responde Planu Asaun Nasionál (PAN) ba ema ho defisiénsia iha futuru.

“Ba oin ita sei haree tanba iha ona Planu Asaun Nasionál ba ema ho defisiénsia maibé PAN liga ba ministériu 11 no la’ós MSSI mak determina. Maibé MSSI hanesan koordenadór ba PAN, nune’e ita sei harii Konsellu Nasionál ba ema ho defisiénsia iha tempu badak, nune’e responde Planu Asaun Nasionál (PAN) iha futuru,” nia hateten ba jornalista sira, hafoin halo enkontru ho ema ho defisiénsia sira, iha MSSI Caicoli, Dili, tersa ne’e.

Nune’e, preokupasaun hotu-hotu ne’ebé maluk ema ho defisiénsia sira hato’o ne’e MSSI rejista ona ne’ebé liga ba Inkluzaun Sosiál, no iha Konsellu Nasionál ne’e ekipa traballu mak MSSI mak sei halo koordenasaun.

“Ita mós ohin rejista ona preokupasaun balun hanesan sira dehan iha públika katak tenke implmenta inkluzaun sosiál ba ita-nia maluk ema ho defisiénsia sira,” nia dehan.

Iha fatin hanesan, Koordenadór ba Grupu Transparánsia, Rede Nasionál ba Asuntu no Akuntanbilidade, Sabino Fitun, hateten, ema ho defisiénsia ohin mai hato’o preokupasaun kona-ba Inkluzaun Sosiál ba Ministra Solidariedade Sosiál no Inkluzaun.

“Objetivu ami ko’alia ho Governu liga ho nesesidade ema ho defisiénsia sira-nian, tanba tinan kotuk ami observa katak Orsamentu Jerál Estadu sempre la inkluzaun ka la asesivel. Maske ita halo ona PAN iha 2014 no foin lalais aprova tan ona tinan 2021 to’o 2030 ne’e nafatin,” Sabino esplika.

Aleinde ne’e, nia mós informa kona-ba edifísiu públiku iha Timor-Leste nafatin la asesivel ba ema ho defisiénsia sira.

“Tanba ohin ami mai haree MSSI ne’ebé lidera ema ho defisiénsia rasik nia edifísiu la asesivel liu. Asesivel ne’e hahú hosi MSSI mak ba edifísiu públiku seluk nune’e husu ba MSSI atu hadi’a lift hodi ema ho defisiénsia sira bele uza,” nia dehan.

Tanba ne’e, nia dehan, ema ho defisiénsia la presiza osan barak maibé husu kada ministériu aloka de’it osan 1-2% hodi haree no responde asesibilidade hanesan ba infraestrutura no edifísiu, nune’e iha asesividade ba ema ho defisiénsia sira.

“Purezemplu, edukasaun nian, karik ita halo eskola ida presiza iha rampa nune’e asesivél ba ema ho defisiénsia. Ha’u foti ezemplu ida mak eskola iha Fatuahi ne’ebé eskola rasik la asesivel ba ita-nia maluk defisiénsia atu asesu,” nia esplika.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here