Diretór Diresaun Relasaun Publika LFTL, Diogo Neto Fraga. Imajen/Espesiál

DILI, 21 juñu 2022 (TATOLI)– Diretór Relasaun Públiku Liga Futeból Timor-Leste (LFTL), Diogo Neto Fraga, hateten komisaun organizadora LFTL preparadu hodi organiza liga futeból tuir oráriu Federasaun Futeból Timor-Leste (FFTL) , iha fulan agostu tinan ne’e.

“Ami preparadu hela, bainhira ami nia parseiru FFTL fó sai ona data klaru atu hala’o liga. Sé sira (FFTL) dehan agostu loos ona  tanba formatu tinan ne’e tenke tuir Federation International Football Federation (FIFA) no Asian Football Confederation (AFC),” Diretór Diogo, hateten ba Agência TATOLI ba Jornalista-sira iha edifísiu LFTL Dili, tersa ne’e.

LFTL mós prontu tuur hamutuk ho líder FFTL hodi diskute kona-bá preparasaun atu hahú torneiu futeból ne’e.

“Ami sei lori nafatin preparasaun sira antes ne’e atu aprezenta ba sira FFTL hanesan órgaun reguladór futeból atu aseita bele hahú liga timorense ne’e,” nia afirma.

Iha sorin seluk, Prezidente FFTL, Francisco Martins da Costa Pereira Jerónimo , informa tempu besik sei halo enkontru ho ezekutivu FFTL, nune’e bele reuniaun fali ho LFTL hodi diskute kle’an ba liga ne’ebé sei komesa iha agostu ne’e.

Prezidente FFTL atuál Ministru Asuntu Parlamentár no Komunikasaun Sosiál (MAPKOMS), Francisco Jerónimo. Imajen Tatoli/ Egas Cristóvão

“Ha’u sei enkontru tiha lai ho ezekutivu sira, hafoin enkontru fali ho sira LFTL, tanba sira atu aprezenta sira nia orsamentu, maibé ami sei hasoru malu lai para ko’alia no haree hamutuk preperasaun liga ne’e,” nia afirma.

Tinan ne’e, Governu liuhosi Sekretáriu Estadu Juventude no Desportu (SEJD) atribui ona $200.000, nune’e FFTL sei aumenta tan fundu balun hodi realiza liga futeból Timorense ne’e.

“Ita nia governu aloka ona $200.00, ne’e ami sei haree hela atu tau hamutuk fundu balun iha ne’ebá. Maibé ami mós husu sira atu aprezenta relatóriu kona-bá osan hira mak patrosinadór sira apoia ba sira atu ita bele halo kalkulasaun,” Prezidente FFTL ne’e sujere.

Molok ne’e, Liga Futeból Timor-Leste (LFTL), hahú iha loron (21/02) too (21/03) loke ona janela transferénsia ba klube 19 ne’ebé hamahan an iha LFTL hodi halo rejistu ba jogadór nune’e bele partisipa iha liga époka ne’e tuir kritéria no oráriu   Asian Football Confederation (AFC) nian loke ona iha 10 fevereiru too 10 marsu.

Tanba ne’e, LFTL husu ba klube hotu atu hakbesik an ba edifisiu LFTL hodi rejista naran jogadór sira nune’e bele kompete iha liga tinan 2022 nian.

Iha époka ne’e kompetisaun sei la’o nakonu iha tinan ida nia laran, tuir kalendáriu tentativa ne’ebé iha ona sei hahú 21 abríl no ramata iha 12 novembru tinan ne’e.

Entretantu, jogu ba primeira divizaun ba primeira volta no segunda volta sei halao iha Estádiu Munisipál Dili no Estádiu Gleno ho totál jogu 90 ba klube 10 ne’ebé tuur hela iha primeira divizaun. Enkuantu ba segunda divizaun klube sia (9) sei joga de’it iha Estádiu Munisipal Dili hamutuk jogu 36.

Alende ne’e, iha jogu tasa 12 Novembru sei joga hosi klube 19 no nafatin hosi sistema vota fora ou lakon sai hamutuk jogu 18.

Klube 19 ne’e mak hanesan primeira divizaun AD SLB Laulara, AS Ponta Leste, Karketu Dili FC, Assalam FC, Emanuel FC, Aitana FC, Lalenok United FC, Atletico Ultramar, Academica FC no Porto Taibessi FC.

Enkuantu Segunda Divizaun mak hanesan, Kablaki FC, Nagardjo FC, DIT FC, Lica-Lica FC, Lemorai FC, AS Marca, FIEL FC, Zebra FC no Boavista FC Timor.

Notísia relevante:  Jullu, FFTL hahú loke janela transferénsia ba Liga Feto Timór

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here