Vise-Ministru Administrasaun Estatál (MAE), Lino de Jesus Torrezão, inaugura Uma Kbiik Laek (UKL) iha suku Lour-Covalima. Imajen/Espesiál.

DILI, 18 juñu 2022 (TATOLI)— Vise-Ministru Administrasaun Estatál (MAE), Lino de Jesus Torrezão, husu ba benefisiáriu sira atu kuidadu no utiliza ba Uma Kbiit Laek (UKL)  ne’ebé Governu oferese ho di’ak.

Vise MAE hatoo asuntu ne’e bainhira halo inaugurasaun ba Uma Kbiit Laek iha aldeia Tabulasi, suku Seloi-kraik, postu administrativu Aileu-Vila, munisípiu Aileu.

“Uma ne’e entrega ba imi labele mosu iha buat ruma, dalaruma iha oan sira hakarak atu hela iha uma ne’e, sira bele halo konfrontu fila-fali ho inan-aman, ne’e labele. Tanba uma ne’e la’ós ba oan sira, maibé ba inan kbi’it laek sira,” refere nota ne’ebé Agência TATOLI asesu, sábadu ne’e.

Notísia relevante: PN aprova millaun $63,6 konstrui “Uma Kbiit Laek” 10 kada suku

Governante ne’e hatutan: “Ha’u hateten ba inan-aman sira ne’ebé hela ona iha uma ne’e tenke haree didi’ak para uma ne’e bele dura liután. La’ós dehan tinan sanulu, maibé uma ne’e bele dura tinan 20 ba leten, tenke halo manutensaun didi’ak, haree didi’ak, depois tenke hela iha laran. Labele ba hela fali iha to’os laran hela fali iha uma ne’ebé mak imi halo iha toos laran no uma ne’ebé mak iha ona tenke mai hela iha laran, sé enkuantu ita la hela iha laran entaun nia bele aat lalais.”

Oitavu Governu Konstitusional sei halo esforsu nafatin ba balun ne’ebé mak seidauk hotu tanba dalaruma la asesu ba estrada, ida fali balun seidauk hotu tanba fornesedór sira laiha konsiénsia atu halo oinsá maka bele ajuda konstrui lalais.

Maski, nia dehan kondisaun estrada balun la di’al, maibé agradese ba kompañia ne’ebé konsege lori materiál fábrika no materiál lokál mai to’o iha fatin ne’e hodi konklui ba obra hirak ba inan-aman kbiit la’ek sira.

“Ita-nia ema kbi’it laek sira atu hetan uma ne’ebé ho dignu ba sira, maizumenus 84%, UKL prontu ona maibe hela 16% mak seidauk hotu tanba asesu estrada mak laiha no mós materiál lokál ho materiál fábrika lato’o iha ne’eba,” nia akresenta.

Notísia relevante: Governu hahú ona konstrui “Uma Kbiit Laek” 1.254 iha territóriu nasionál

Iha programa VIII Governu Konstituisionál prioritiza kona-ba abitasaun no bainhira Governu define atividade ne’e ho objetivu prinsipál garante moris di’ak sidadaun nian kontribui ba redús ki’ak.

Iha tinan fiskál 2021, MAE liuhosi PNDS konstrui Uma Kbiit Laek (UKL) hamutuk 1.254, ne’ebé nia progresu iha munisípiu hotu la’o di’ak no hetan apresiasaun boot hosi komunidade ne’ebé hetan benefísiu direta.

Enkuantu, iha tinan 2022, Governu liuhosi Ministéiru Finansa aloka orsamentu besik millaun $8 atu kontinua programa refere maibé ida-ne’e la to’o atu hala’o iha suku hotu-hotu tanba redusaun 75% hosi orsamentu ne’ebé aloka iha tinan ida-ne’e.

Tan ne’e, Deputadu sira iha Parlamentu Nasionál, aprova orsamentu $63,600.000 ba tinan fiskál 2022 hodi konstrui Uma Kbi’it Laek (UKL) 10 kada suku iha territóriu nasionál.

Notísia relevante: Ekipa téknika PNDS sei halo sensibilizasaun kona-ba UKL iha 18 janeiru

Jornalista : Osória Marques

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here