Ministériu Solidariedade Sosiál no Inkluzaun MSSI) halo lansamentu nasional ba programa Bolsa da Mãe Jerasaun foun, iha sala maternidade sentru saúde Cailaco, munisípiu Bobonaro. Imajen Tatoli/Sérgio da Cruz.

BOBONARO, 17 juñu 2022 (TATOLI) – Ministériu Soslidadriedade Sosiál no Inluzaun (MSSI) sesta ne’e lansa programa Bolsa da Mãe jerasaun foun iha sala maternidade sentru saúde postu administrativu Cailaco, munisípiu Bobonaro.

Programa ne’e nia objetivu prinsipál atu melolra rendimentu familiár, estímula erradikasaun pobreza no hamlaha, melloramentu saúde no nutrisaun inan  isin-rua no labarik.

Nune’e mós promove atividade ekonomia lokál  no hasa’e kualidade edukasaun hodi kontribui ba atinjimentu objetivu ba dezenvolvimentu sustentável.

Enkuantu valór transferénsia maka dolar $15 kada fulan ba subsídiu inan isin-rua no dolar $20 kada fulan subsídiu ba oan ida iha 2022, maibé valór ne’e sei revee  hodi ajusta ho kada tinan bazea ba taxa inflasaun.

Programa ne’e lansamentu nasionál iha munisípiu tolu mak hanesan Oe-Cuse, Ainaro no Bobonaro tanba munisípiu hirak-ne’e mak  bazea ba indikadór kombinadu ra’es badak no Kiak aas liu no progresivamente sei estende ba munisípiu sira hotu.

Ministra Solidariedade Sosiál no Inkluzaun, Armanda Berta dos Santos, katak, Governu implementa programa ne’e hodi korresponde ba realidade iha Timor-Leste nian tanba númeru má-nutrisaun no ra’es badak kontinua rejista aas.

“Ho situasaun sira-ne’e mak governu hamosu polítika investimentu ne’e ba longu prazu, nune’e governu tau prioridade ba ema tanba ema mak alvu ba iha pillár ba sistema protesaun sosiál no objetivu dezenvolvimentu sustentável,” Mensajen ne’e transmite hosi Diretor Jerál MSSI, Florencio Pina Gonzaga.

Iha lansamentu ne’e governu  hahú rejista ona inan isin-rua no labarik sira inklui ho kodisaun defisiénsia liu hosi mekanismu sistema atendimentu dijitál hodi mellora atendimentu públiku ne’ebé adekuada hodi garante efetividade, efikásia no tranparánsia ba sidadaun sira hetan direitu tuir lei haruka.

Governu mós hatuur ona prosedimentu, matalalan no kompeténsia entidade implementadór sira iha diploma ministeriál konjuta entre MSSI no MS. Nune’e parte hotu sei kumpre ba eskuandramentu dekretu lei númeru 22/2021, 10 novembru.

“Programa ne’e mós sei haburas  ligasaun osan plus ho inisiativa komplementár sira iha nutrisaun ho saúde no sai inan-aman di’ak hodi hakbesik ba fasilidade saúde,” nia katak.

Reprezentante Servisu Saúde Munisípiu Bobonaro, Paulina Dineira, hateten programa ne’e atu redús taxa mortalidade inan ho oan, tanba ne’e husu ba aman sira labele haree de’it ba benifísiu hosi programa ne’e, maibé tenke aplika mós planeamentu familiár.

Administradór postu administrativu Cailaco, Alfredo Meta-Dau, sente kontente no agradese ba Governu Austrália no Governu Timor-Leste ne’ebé inísia programa ne’e tanba Bolsa da Mãe jerasaun foun bele tulun ona komunidade sira.

“Programa ida-ne’e benefísia direita ba ita-nia komunidade sira, liuliu jerasaun foun ba nasaun sira, tanba ne’e ha’u husu ba xefe suku sira atu koordena ho MSSI no saúde servisu ho seriedade halakon egoizmu sektoriál atu nia implementasaun bele la’o ho susesu,” nia apela.

Totál benefisiáriu Bolsa da Mãe jerasaun joun iha territóriu nasionál hamutuk 27,411 ho montante millaun $6.178 no orsamentu ne’e finánsia hodi governu Austrália.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here