Xefe suku Malelat, José Marques. Imajen Tatoli/Abílio Elo Nini.

OÉ-CUSSE, 18 juñu 2022 (TATOLI) – Xefe suku Malelat, sub-rejiaun Pássabe, Rejiaun Administrativa Espesiál Oé-Cusse Ambeno (RAEOA), José Marques, fó sai katak, grupu sia (9) ne’ebé sai benefisiáriu iha suku Malelat susesu implementa projetu Hasa’e Produtividade Agrikultura Sustentavél (HAPAS).

“Hahú projetu ne’e tama iha suku Malelat, faze primeiru iha grupu tolu, Oémanikin, Biseno no Bijaesunan, grupu rua haki’ak animál karau, agora iha ona oan no balu fa’an ona, grupu Oénik dezenvolve floresta kuda ai-oan hanesan sabraka, no grupu ida foku ba ortikultura, kuda produtu lokál talas, no agora grupu sira distribui ona iha merkadu, ne’ebé grupu balu susesu ona no grupu balu sei kontinua la’o hela, maibé ha’u garante ha’u-nia suku sei susesu tanba iha-ne’ebá poténsia hakiak animál no prodús agrikultura nian,” Xefe suku Malelat, José Marques, hateten iha Oé-Cusse, sesta ne’e.

Nia informa, iha faze segundu iha grupu neen, daudaun ne’e hetan ona apoia ekipamentu hosi Ministériu Agrikultura no Peska (MAP), tanba iha to’os grupu sira-ne’e nakonu ho produtu sira, entaun presiza ekipamentu hanesan mákina atu dada bee-moos, rega modo nian, pregu no kalen, ne’ebé prezensa projetu ne’e halo komunidade preokupa atu halo serbisu.

“Entaun ha’u hanesan haree programa ne’e kapaas, tanba apoiu fundu ki’ik ba komunidade atu servisu grupu hodi muda moris, tanba fundu ne’e hetan gratuita entaun komunidade hatene ona oinsá halo to’os no hakiak animál, ha’u konsidera grupu iha inisiativa di’ak atu hamenus problema iha suku ba komunidade nia moris,” nia orgullu.

Nia fó-sai katak, grupu haat mak hakiak animál, kada grupu envolve membru na’in-30, agora kada membru iha hotu animal, tanba grupu haat ne’e, balu haki’ak bibi no karau, hotu-hotu hatama iha luhan.

Maibé kona-bá rendimentu, autoridade komunitáriu nia parte laiha koñesimentu tanba ne’e rendimentu grupu nian, maibé nu’udar autoridade másimu iha suku Malelat iha obrigasaun atu motiva no enkoraza komunidade ne’ebé envolve iha grupu atu promove unidade pas, nune’e bele hetan susesu iha projetu ne’e.

Nune’e nia sujere ba Estadu Timor-Leste liuhosi Ministériu Agrikultura no Peska (MAP), atu kontinua hala’o nafatin projetu ne’e iha futuru.

“Labele para tenke iha kontinuasaun, tanba programa mai hamoris komunidade sira, tanba apoiu fini animál no alimentár ba komunidade atu serbisu ba aan rasik,” nia sujere.

Tuir dadus grupu benefisiáriu hamutuk 71 iha Rejiaun Administrativa Espesiál Oé-Cusse Ambeno (RAEOA), faze dahuluk 37 no preparasaun 34, maka sai alvu asesu ona fundu hosi Ministériu Agrikultura no Peska (MAP) hodi ezekuta planu prioridade iha projetu Hasa’e Produtividade Agrikultura Sustentavél (HAPAS) iha faze primeiru no faze preparasaun ba tinan lima.

Grupu hirak-ne’e mai hosi suku alvu neen mak hanesan, iha sub-rejiaun Pássabe implementa iha suku Malelat, iha sub-rejiaun Oésilo implementa iha suku Bobometo, Usitaqueno no Usitasa’e, iha sub-rejiaun Nítibe implementa iha suku Ban-Afi, no iha sub-rejiaun Pante Makasar implementa iha suku Naimeko ho totál grupu alvu hamutuk 71.

Entretantu, iha 16 novembru 2016 Governu Timor-Leste liuhosi Ministériu Agrikultura no Peska (MAP) selebra akordu ida ho Banku Mundiál hosi Nasaun Unida kona-ba implementasaun projetu Hasa’e Produtividade Agrikultura Sustentavél (HAPAS).

Projetu ne’e Ministériu Agrikultura no Peska (MAP) ho Banku Mundiál, hahú halo lansamentu iha 29 setembru 2017, munisípiu hitu (7) maka sai alvu iha implementasaun faze dahuluk, hanesan basia idrográfika Be-Lulik, realiza iha munisípiu Ainaro no Covalima, basia idrográfika Loes, realiza iha munisípiu Ermera no Bobonaro, basia idrográfika Raumoco, realiza iha munisípiu Lautem, no basia idrográfika Tono, realiza iha Rejiaun Administrativa Espesiál Oé-Cusse Ambeno (RAEOA).

Projetu ne’e implementa hosi Ministériu Agrikultura no Peskas (MAP) hetan finansiamentu fundu hosi Programa Seguransa Ai-han no Agrikultura ka Global Agriculture and Food Security Programme (GAFSP) ho montante hamutuk millaun $21.

Notísia relevante:  Suku Usitaqueno husu MAP kria merkadu ba produtu ne’ebé prodús hosi HAPAS

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here