Komunidade suku Leimea Craic, rona no hato’o sira-nia preokupasaun ba Governu liuhosi diálogu komunitária ne’ebé hala’o iha suku Leimea Craik. Imajen Tatoli/Nelia Fernandes.

ERMERA, 16 junu 2022 (TATOLI)—Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, kinta ne’e, hala’o diálogu komunitáriu ho komunidade iha suku Leimea Craik, postu administrativu Hatulia, munisípiu Ermera liuhosi programa “Naroman Ba Suku”.

Administradór Postu Administrativu Hatulia, Luis Manuel, hateten programa Governu iha povu nia leet “Naroman ba suku” iha fulan kotuk ne’e, halo ona iha Hatulia Vila no iha momentu ne’ebá katak sei halo mós iha suku Leimea Craic, nune’e agora realiza ona iha ne’e.

“Programa ne’e importante tebes, karik diálogu iha asuntu ruma relasiona ho dezenvolvimentu suku, labele rai iha imi nia laran no bele ko’alia direta, atu nune’e nia resposta bele rona direta kedan,” Luis Manuel hateten liuhosi nia diskursu iha ámbitu diálogu komunitáriu ne’ebé realiza iha sede suku Leimea Craic, kinta ne’e.

Iha suku Leimea Craic inklui mós iha Postu Administrativu Hatulia A, ho nia totál xefe familia 118 ho nia populasaun hamutuk rihun 1.179, hasoru difikuldade lubuk ida.

Difukuldade dahuluk mak kondisaun dalan (estrada) aat tanba iha tempu Indonézia aspal tama ona maibé tanba iha tempu ne’ebá kuandu hedi fatuk fui aspal, entaun tempu naruk ona aspal sira la hatene semo lakon hotu ba ne’ebé, fatuk ida hedi ne’e maka sei nafatin.

Alende difikuldade estrada, iha mós difikuldade seluk mak eletrisidade, tanba to’o agora suku Leimea Craic seidauk asesu eletrisidade. Problema seluk mak bee-moos, tanba bee-moos mós sai pontu importante ida difikulta tebes povu Leimea Craic nia moris.

“Tanba ne’e, ami orgullu no agradese ba Ministru MAPKOMS no MAKLN tanba bele mai direta iha ne’e, hodi rona komunidade Leimea Craic nia difikuldade,” nia dehan.

Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, hateten programa diálogu komunitária ka programa “Naroman ba Suku ” ne’e hanesan Governu mai iha povu nia leet hakarak halo diálogu ho komunidade sira, hodi hatene sira-nia preokupasaun no problema ne’ebé sira hasoru, liu-liu problema loro-loron no difikuldade ne’ebé sira enfrenta iha sira-nia moris.

Governu liuhosi Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, hala’o diálogu komunitáriu ho komunidade iha suku Leimea Craik. Imajen Tatoli/Nelia Fernandes.

“Tanba ne’e diálogu ne’e halo, Governu mai iha povu nia leet hodi rona no Governu haree solusaun saida mak bele fó ba sira iha tempu badak. Iha diálogu ne’e, ohin Administradór Hatulia hato’o preokupasaun kona-ba eletrisidade, ha’u hanoin ami halo ona koordenasaun ho parte eletrisidade no sira husu katak iha tinan ne’e sira sei mai, atu dada eletrisidade mai iha Leimea Craic. Ida-ne’e EDTL sira mak fó hatene no agora ami informa ba komunidade,” nia dehan.

Kona-ba bee-moos, nia dehan, nia parte sei ko’alia ho Ministru Obra Públika atu nusa haree bee-moos bele dada no hadi’a fila-fali kanu ne’ebé aat, nunee komunidade bele asesu ba bee-moos no estrada.

Kona-ba estrada ne’ebé aat, nia parte mós sei informa fali ba Ministru Obra Públika hodi haree oinsá programa estrada rurál bele mós hola atensaun mai iha Leimea Craic.

Xefe suku Leimea Craic, Mario Gonsalvez, sente orgullu ho programa naroman ba suku tanba durante nia mandatu atu ba tinan hitu no madatu ba tinan oin atu ramata, vizita ofisiál ida-ne’e foin primeira vez akontese.

“Ida ne’e sente orgullu la’ós ha’u mesak maibé ami hamutuk ho komunidade sente orgullu, tanba ne’e ohin mai nakonu iha ne’e. Maske, sira (komunidade) iha hela preokupasaun natar, maibé sira iha vontade tomak atu bele kontribui ba programa ne’ebé Governu iha, liu-liu ba programa naroman ba suku. Ho ida-ne’e, ami esforsu hela no hakarak kontinua programa ne’e. Tanba, ohin halo ona diálogu komunitáriu, ami fiar katak tempu tuir ekipa sei mai no ami sei servisu hamutuk oinsá atu halo prefill suku no oinsá estabelese sentru. Se estabele sentru ne’e, ami sente fasil liu oinsá atu haruka informasaun ba iha nasionál,” nia dehan.

Entretantu, atividade diálogu komunitáriu ho komunidade iha suku Leimea Craik, postu administrativu Hatulia, munisípiu Ermera ne’e hetan partisipaun hosi Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, Ministru Asuntu Kombatente Libertasaun Nasional (MAKLN), Julio Sarmento da Costa ‘Meta Malik, Vise-Ministru Administrasaun Estatál, Lino de Jesus Torrezão, Diretór Jerál Servisu Kooperativu Ministériu Saúde, Marcelo Amaral, Administradór Postu Administrativu Hatulia, Luis Manuel, Xefe suku Leimea Craic, Mario Gonsalvez, funsionáriu MAPKOMS, komunidade Leimea Craic no sira seluk.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here