ASEAN University Games.Imajen/espesial

DILI, 15 juñu 2022 (TATOLI) – Prezidente Federasaun Desportu Akademiku Timor-Leste (FDATL), Zeferino Viegas Tilman, informa modalidade desportiva hamutuk neen  hahú preparadu atu kompete ASEAN Uniersity Games ne’ebé hala’o iha Tailándia, hahú iha loron 26 juñu too 6 agostu tinan ne’e.

“Hela de’it loron-40, ita bá kompete iha eventu internasionál ne’e, ami servisu hamutuk ho federasaun desportu sira hodi atleta sira hahú preparadu hotu hodi partisipa iha eventu ne’e,” Prezidente FDATL, Zeferino, hateten  ba Agência TATOLI iha edifisiu Universidede Nasionál Timor-Lorosae (UNTL) Dili, kuarta ne’e.

Prezidente Federasaun Desportu Akademiku Timor-Leste (FDATL), Zeferino Viegas Tilman. Imajen Tatoli/António Gonçalves

Modalidade ne’ebé atu partisipa iha eventu ne’e hamutuk-lima, hanesan futeból, Voleyból Praia, Xadres, Atletizmu no Taekwondo.

“Modalidade hirak ne’e ita iha atleta selesionadu fiksu ona liuliu futeból jogadór na’in-18, Taekwondo na’in-rua, Atletizmu na’in-rua, Voleyból Praia na’in-haat no Xadres na’in-haat,” nia relata.

Tanba ne’e, desizaun finál sei haruka ba Sekretáriu Estadu Juventude no Desportu (SEJD) atu hare nune’e bele apoiu orsamentu.

“Kona-ba orsamentu ami servisu maka’as no komunika ho komisaun organizadora ba eventu ne’e katak ita sei la selu akomodasaun balun iha ne’ebá hanesan hela fatin, hahán no seluk tan, ida ne’e hamenus ona ita nia orsamentu ne’ebé kalkula ba mai ita sei utiliza de’it orsamentu hamutuk $200.000 ou bele tun tan husi ne’e, osan ita hetan apoiu hosi SEJD,” Resposavél afirma.

ASEAN University Games hanesan eventu rejionál ne’ebé halo kada tinan haat dala-ida, no sei partisipa hosi Universidade iha ASEAN ne’ebé kompostu hosi nasaun 11 hanesan, Indonézia, Malázia, Tailándia, Filipina, Vietname, Cambodia, Laos, Brunei Darusalam, Singapura no Timor-Leste.

Notísia relevante: 24 juñu, Ekipa U-16 bá treinu iha Korea Súl hodi kompete kopa AFF

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here