Tékniku EDTL halo instalasaun eletrisidade iha área Bebora, Dili. Imajen TATOLI/António Gonçalves

COVALIMA, 15 juñu 2022 (TATOLI)–Xefe suku Beco, Postu Administrativu Suai Vila, Munisípiu Covalima, Arlindo Bernandino Lemos, informa komunidade aldeia Teda, Tobur no Halik iha suku Beco to’o agora seiduak asesu eletrisidade.

“Ita restaura ona independénsia to’o toina 20 (20 maiu 2002 to’o 20 maiu 2022) ona maibé komunidade kontinua sofre tanba seidauk asesu eletrisidade. Maske iha Timor laran komunidade barak mak asesu ona eletrisidade maibé ami bainhira mak atu asesu eletrisidade,” Arlindo Bernandino Lemos hato’o preokupasaun ne’e ba jornalista sira, iha suku Beco, kuarta ne’e.

Daudaun ne’e, realidade komunidade uza ka sunu de’it lampu tradisionál iha tempu kalan durante tinan 20-resin ona, tanba ne’e Governu presiza prevee orsamentu hodi instala liña eletrisidade ba komunidade iha aldeia tolu ne’e atu bele sente entik Timor-Leste nia ukun rasik an ne’e.

Tanba laiha liña eletrisidade entaun difikulta tebes estudante sira atu estuda iha tempu kalan no mós komunidade ne’ebé mak presiza eletrisidade atu loke negósiu oan ruma mós susar tebes.

Kona-ba problema eletrisidade ne’e nu’udar autoridade komunitária hato’o ona proposta ba iha Ministériu relevante atu apoiu painel solár ba komunidade no atu asina ona kontratu ho Governu, maibé impaktu hosi pandemia COVID-19 la konsege asina kontratu.

“Ha’u rasik hato’o ona proposta ba Ministériu Obra Publika (MOP) kona-ba eletrisidade no Governu atu apoiu painel solár maibé agora laiha rezultadu, tanba implementa serka sanitária la konsege asina kontratu,” nia dehan.

Problema ne’ebé mak komunidade enfrenta iha suku no aldeia ne’e hanesan problema xefe suku nian no problema ne’ebé sefe suku enfrenta iha baze hanesan mós problema Governu nian.

Suku Beco kompostu hosi aldeia sira hanesan Haemanu, Aidantuik, Holbolu, Maucola, Bibiatan Gala Zoak Tudilpo asesu ona eletrisidade no falta de’it aldeia Halik ho nia populasaun 61, Teda ho populasaun 49 no aldeia Tobur ho populasaun hamutuk 75 mak seidauk asesu eletrisidade.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here