DILI, 15 juñu 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova projetu dekretu-lei ne’ebé aprezenta hosi Ministru Ensinu Superiór, Siénsia no Kultura (MESSK), Longuinhos dos Santos, kona-ba rejime jurídiku ba estabelesimentu ensinu superiór.
“Projetu dekretu-lei ne’e ho objetivu mak atu hadi’a aspetu oioin hosi atuál rejime jurídiku ba estabelesimentu ensinu superior, ne’ebé estabelese hosi dekretu-lei númeru 8/2010, loron 19 maiu,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha Palásiu Governu.
Notísia relevante: MESSK no BNCTL assina akordu Liña Kréditu” Ensinu Superior Kualidade+”
Nune’e, entre alterasaun sira ne’ebé introdús, destaka aplikasaun konkreta hosi rejime jurídiku kuríkulu padraun nasionál ba ensinu superiór, ne’ebé tama ona iha vigór iha Timor-Leste liuhosi dekretu-lei númeru 3/2022, loron 12 dezembru no konsolida konseitu bináriu sistema ensinu superiór nian.
Aleinde ne’e, introdús norma sira kona-ba asosiativizmu estudantíl, antigu estudante sira, apoiu ba estudante sira iha ninia insersaun iha vida ativa, figura provedór estudante.
Aprezenta mós regra sira kona-ba fuzaun, fahe ka transferénsia estabelesimentu ensinu superiór privadu inklui rekoñese interese publiku hosi estabelesimentu ensinu superiór no kona-ba fiskalizasaun no inspesaun ba instituisaun ensinu superiór nian.
Jornalista : Antónia Gusmão
Editora : Julia Chatarina
