Koordenadór ba Programa Estímula Empreendedorizmu Sosiál ba grupu juventude suku iha Gabinete Sekretáriu Estadu Juventude no Desportu (SEJD), Manuel Monteiro Fernandes. Imajem/ Hortencio Sanchez.

DILI, 14 juñu 2022 (TATOLI)– Sekretáriu Estadu Juventude no Desportu (SEJD), liuhosi programa estímula empreendedorizmu sosiál ba juventude, konsege apoia fundu ba grupu joven kreativu na’in-408, hosi postu administrativu 55 no suku 267 iha territóriu laran.

Governu liuhosi SEJD realiza programa ne’e ho objetivu lori joven sira hala’o atividade produtivu hodi kontribui ba dezenvolvimentu ekonómiku no kontribui mós ba prosesu rekuperasaun ekonomia ne’ebé Governu hala’o hela iha territóriu nasionál.

“Programa ne’e mai hosi Sekretariu Estadu Juventude no Desportu ne’ebé ho politika ida “juventude milenial forsa kreativu” ne’ebé implementa tinan ida ona buat hotu la’o di’ak tanba munisipiu hotu implementa ho kooperasaun ho sentru juventude sira ne’ebé sai benefisiáriu hamutuk 408,”Koordenadór Programa Estímula Empreendedorizmu Sosiál ba Juventude Suku iha Gabinete SEJD, Manuel Monteiro Fernandes, hateten ba Agência TATOLI iha edifisiu SEJD Dili, tersa ne’e.

SEJD iha polítika no planu ne’e sira rasik mak hahú hamoris no halo preparasaun ba matadalan programa nian ho kriteria grupu juventude tenke ho membru na’in-neen ba leten no molok ne’e iha ona atividade kreativu balun.

Kritériu asesu ba programa estímula empreededorizmu ne’e hanesan feto no mane ho idade 17 too 35, nune’e ema ne’ebé sai ona benefisiariu iha programa ne’e nain-3-361, kompostu hosi feto na’in-1.080 no mane na’in-2281 iha Timór -laran tomak.

SEJD halo kooperasaun ka parseiru ho sentru juventude munisipál iha territóriu nasionál hamutuk 14 inklui Rejiaun Administrativu Espesiál Oé-Cusse no Ambeno (RAEOA) hodi implementa programa estímula empreedoderizmu sosiál ba juventude sira.

“Sentru juventude munisipiu sira iha territóriu laran hamutuk 14 tanba Dili iha sentru rua hanesan Becora ho Comoro no munisipiu 11 seluk inklui RAEOA, maibé iha implementasaun ne’e munisipiu Baucau seidauk tama. Tanba sira nia sentru sei iha hela prosesu restruturasaun,” nia afirma.

Iha tinan 2021, SEJD liuhosi Sentru Juventude loke oportunidade ba grupu hotu no iha grupu hamutuk 763 mak aplika, maibé iha prosesu verifikasaun, grupu hamutuk 408 mak pasa ka prienxe kritéria hodi hetan oportunidade ba programa ne’e.

“Iha tinan kotuk ami halo ona monitorizasaun ba grupu hamutuk 84, iha monitorizasaun ne’e grupu barak mak susesu, hanesan iha Lautem nian sira kolleta ikan, ne’ebé konvida mós SEJD ba partisipa bainhira iha kolleta primeiru sira faan hetan osan hamutuk $600, maibé agora daudaun sira kontinua hakiak, grupu seluk iha Ainaro sira halo modo no hakiak karau agora dadauk hatama ona iha uma oho karau nian, kada semana sira hatama ona karau mai Dili,” nia afirma.

Iha Munisípiu Ermera iha grupu ne’ebé halo produsaun ba rai-metan kada fulan hatama dala tolu mai Dili no munisipiu seluk ne’ebé presiza adubu sira ne’ebé faan ho kilogram ida ho folin sentavu $0,25. Kada fulan tolu prodús tonelada 25.

Munisípiu Aileu iha grupu balun ne’ebé susesu iha ortikultura hodi prodús modo no ai-fuan fresku sira, hanesan strawberry hodi hatama ona iha supermerkadu sira iha Dili laran. Ainaro ne’ebé prodús modo haruka mai Dili no sustenta mós merkadu sira iha Ainaro no Aileu.

Grupu joven iha Manufahi kria mós ortikultura, pekuária no peska ne’ebé ho nia rezultadu di’ak tebes.

“Sira ohin temi ona ne’e monitorizasaun ne’ebé halo iha tinan kotuk, maibé iha tinan ida ne’e ami foin halo monitorizasaun iha munisípiu rua RAEOA no Manatuto, iha Manatuto sira iha grupu 34 no RAEOA hamutuk 29. Agora daudaun ami seidauk formula nia relatóriu, iha balun susesu, maibé balun la susesu tanba sira hanoin katak osan ne’e Estadu nian ne’e osan sira nian mós ne’ebé sira bele gasta de’it.Nune’e ba oin ita sei haree meiu fó saida ba sira,”  Koordenadór ne’e informa.

Daudadun ne’e, totál grupu benefisiáriu mak iha Aileu grupu hamutuk 45, Ainaro grupu 32, Bobonaro grupu 40, sentru juventude Becora-Dili iha  grupu 27, Comoro iha grupu 23, Covalima iha grupu 26, Ermera iha grupu 52, Lautem iha grupu 44, Liquiça iha grupu 32, Manatuto iha grupu 34, Manufahi iha grupu 27, RAEOA iha grupu 22, Viqueque iha grupu 33.

Hosi programa empreendedorizmu ba juventude ne’e kada grupu halo atividade ne’ebé la hanesan balu hakiak ikan, manu, kuda modo, ai-fuan, hakiak karau no seluk tan.

Hosi programa ne’e SEJD preve osan hosi item transferénsia públiku nian ho montante $619,800.30.

“Kada grupu ida ita fó $1.000, maibé ita sei la fó 100% katak ita fó uluk 40% bainhira sira ezekuta hotu ona rezultadu di’ak ita foin fó tan 60% hodi kompleta atu sira bele utiliza duni ba programa ne’e,” nia afirma.

Monitorizasaun ne’ebé SEJD halo iha tinan kotuk ba de’it Munisipiu hanesan Ermera, Aileu, Ainaro no Lautem, iha tinan ne’e sira halo monitorizasaun foin iha Munisipiu rua RAEOA no Manatuto. Tanba ne’e hela Munisipiu Covalima, Bobonaro, Liquiça,Viquque no Dili mak seidauk halo monitorizasaun no sei halo iha tempu besik.

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here