Diretór Servsiu Protesaun Sivíl Risku Dezastre iha Munisípiu Bobonaro, António Soares. Imajen Tatoli/Sérgio da Cruz.

BOBONARO, 14 junu 2022 (TATOLI) – Diresaun Servisu Protesaun Sivíl Risku Dezastre (DSMPSRD ) Munisípiu Bobonaro, apoia ona vítíma dezastre naturál uma-kain 72 ne’ebé afetadu iha tinan 2022.

Diretór DSMPSRD Munisípiu Bobonaro, António Soares, informa, vítima afetadu dezastre hirak- ne’e rejista hahú hosi fulan-janeiru 2022 to’o agora, tanba sira-nia uma hetan estragu hosi inséndiu, rai-halai no bee-sa’e hafoin akontese udan-boot.

Apoia emerjénsia hirak-ne’e oferese ba vítima afetadu sira-ne’e iha tipu oin rua mak hanesan; food item kompostu hosi ai-han bázika sira hanesan, foos, supermie, ikan-lata, mina, masin. Enkauntu non food item mak hanesan lona, manta, bikan, kanuru, kopu no taxu.

“Sira-ne’ebé ami rejista  uma-kain 72 mai hosi postu administrativu Cailaco uma-kain 29, Maliana neen, Bobonaro 14, Balibo 23, iha momentu ami rejista fó kedas apoiu emerjénsia atubele tún sira iha loron balun nia laran,” nia informa ba Agência Tatoli, iha nia kna’ar-fatin, Maliana, tersa ne’e.

Diretór ne’e dehan, iha tempu badak ekipa sira sei tún ba terrenu atu rekola dadus vítima afetadu dezastre naturál iha postu administrativu Lolotoe no Atabae.

Enkuantu ba uma-kain ne’ebé verifikadu atu hetan apoia rekuperasaun, dadaun ne’e  iha ona faze preparasaun tanba proposta  apoia orsamentu ne’ebé DSMPSRD  submete ba Prezidente Autoridade Munisípiu Bobonaro Ernesto de Oliveira Barreto, aprovadu ona.

“Ita munisípiu iha osan rasik atu apoiu ida-ne’e, ita bele tuir ita-nia forsa, ida-ne’ebé mak sira nasionál mak foti dadus, sira mak responsabiliza, ami só bele responde de’it uma-kain 72 ne’ebé ami rejista,” nia hateten.

Nia fó-sai katak, daudaun ne’e estoke apoia emerjénsia kompostu hosi food item ho non food item iha armzein, Soso, Maliana sei sufiensiente hela atu apoia vítima kauze uma-kain 200-resin.

“Dazstre ne’e ita la espera tanba nia mai derrepente de’it, ne’ebé ami fó hanoin  katak presiza asegura sasán sira-ne’e iha pasta, maibé kuandu akontese fó hantene uluk xefe aldeia no xefe suku sira atubele fó informasaun mai ami, bele lori apoiu emerjénsia ba,” nia fó hanoin.

Nia fó-sai katak, bainhira akontese anin  ho volume boot estraga komunidade barak nia uma mak sei lori mai hotu asegura iha patrimóniu estadu sira henesan Jináziu Maliana, sede suku no eskola sira-ne’ebé besik.

Diretór DSMPSRD Munisípiu Bobonaro ne’e fó hanoin ba komunidade sira katak, bainhira akontese anin-boot komunidade sira tenke dook hosi uma ne’ebé besik ai-hun no foho-lolon, no asegura uluk dokumentu importante sira hanesan sertifikadu no diploma.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here