Prezidente Republika, José Ramos Horta, ko’alia ba jornalista sira hafoin partisipa iha seminariu komemorasaun loron mundiál traballadór domestika, iha salaun Luz Clarita, tersa (14 juñu 2022). Imajen Tatoli/Antonio Daciparu.

DILI, 14 juñu 2022 (TATOLI)—Prezidente Repúblika (PR), José Ramos Horta, tersa ne’e, halo abertura ba semináriu ne’ebé organiza hosi ONG FONGTIL hodi komemora loron mundiál traballadór doméstika ho tema “Valoriza no fó protesaun legál ba traballadór doméstika iha Timor-Leste” ne’ebé hala’o iha salaun Luz Clarita, Dili,  

Xefe Estadu ne’e hateten, presiza kria kuadru legál ka lei hodi proteje traballadór doméstika iha rai-laran.

“Traballu doméstiku bele maibé tantu servisu iha família ida-nia uma, servisu iha kompañia ida- nia uma ne’ebé rekruta traballadór, nune’e esplikasaun simples prátika tradisionalmente Timor-Leste iha traballadór doméstika baibain ba ema feto. Maibé ha’u seida’uk haree iha protesaun kuadru legál ruma ba traballadór sira iha atividade ruma,” Prezidente Repúblika ne’e hateten ba jornalista sira.

Tuir dadus hosi FONGTIL liuhosi Dirasaun Sentru Servisu ba feto Timor-Leste ninian hanesan mahon ba traballadór doméstika sira daudaun rejista traballadór doméstika hamutuk 283 iha Dili no munisípiu ne’ebé halo servisu ba iha uma-kain sira maibé laiha baze legál atu asegura direitu hanesan trabaladór.

Nune’e, Xefe Estadu hein rezultadu serimónia ne’ebé organiza hosi FONGTIL oinsá hamutuk hodi haree kestaun refere.

“Hein rezultadu semináriu ho nia input hosi espesialista, ativista, órganizasaun sosiedade sivíl hodi fornese hafoin hamutuk ho Governu, Parlamentu Nasionál haree saida mak di’akliu hodi proteje traballadór doméstika nia direitu,” Horta hateten.

Nia louva servisu atividade FONGTIL ho ONG sira ativu sai portadór tane traballadór doméstiku sira-nia direitu maibé la signifika Governu tinan hirak nia laran la halo buat ida, maibé halo kondisaun oioin, mezmu nune’e traballadór doméstika iha rai-laran seidauk hetan protesaun ho di’ak.

“Fó vantajen setór fatór familiár maibé simu traballadór doméstiku, loos fatin iha família balun selu sira di’ak servisu ladun todan no balun todan tebe-tebes. Maibé Timor-Leste nia realidade oin seluk hanesan ho rai seluk. Iha ita-nia rai-laran, ita bele hatete kondisaun ekonómia sosiál sira defisíl loos manán mínimu maibé pelumenus iha kalan sira bele fila ba uma,” nia dehan.

PR Horta mós dehan, presiza ratifika konvensaun internasionál hodi proteje traballadór doméstika tanba to’o agora konvensaun ne’e seidauk ratifika.

“Ha’u sei rona didi’ak hodi bele haree primeiru Timor-Leste atu halo mak ratifika tratadu no tratadu tenke reflete iha lei ita-nian no implementasaun tanba dalaruma ita asina tratadu depois maibé laiha lei ne’ebé korespondente,” nia hateten.

Maibé, Xefe Estadu ne’e hateten iha konstituisaun fó ona protesaun ba sidadaun ne’ebé Estadu bele oinsá kria fundu ruma apoiu ba sidadaun ho klase ki’ik ne’ebé ki’ak hanesan traballadór doméstika.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here