Líder komunitáriu, kargu diretór no xefia liña ministeriál iha munisípiu Baucau partisipa enkontru establesimentu grupu planu ordenamentu territóriu munisipál iha salaun apuramentu Vila Nova, tersa (14/06). Imajen Tatoli/Natalino Belo.

BAUCAU, 14 juñu 2022 (TATOLI) – Governu liuhosi Ministériu Planu no Ordenamentu (MPO) tersa ne’e, realiza enkontru ho admistrasaun munisipál Baucau hodi estabelese grupu tékniku planu ordenamentu territoriál munisípiu refere.

Diretór Jerál Ministériu Planu no Ordenamentu (MPO), Deolindo da Silva hateten, objetivu hosi enkontru refere ko’alia kona-ba establesimentu grupu hodi asegura programa hanesan parte kontinuasaun.

“Forma grupu atu halo serbisu hamutuk ho konsultór hodi fó informasaun klaru kona-ba karaterizasaun munisípiu Baucau ein-jerál,” Diretór Jerál hosi Ministériu Planu no Ordenamentu, hateten iha Vila Nova.

Tuir planu estabelesimentu grupu refere sei envolve kargu diretór no xefia liña ministeriál, líder komunitária, sosiedade sivíl, partidu polítiku hotu iha munisípiu hodi kolabora ho konsultór hosi Portugál atu hala’o estudu karaterizasaun bazea ba poténsia área tuir jeografia hanesan iha Baucau.

Prezidente Autoridade Munisipál (PAM) Baucau, Olívio ‘Bou Lesa’ Freitas, konsidera enkontru ne’e importante maibé munisípiu mós tenke envolve iha grupu ordenamentu territoriál tanba ajuda foti dadus no halo planu ordenamentu ne’ebé futuru sai matadalan ba dezenvolvementu iha Baucau.

Levantementu dadus sei define munisípiu Baucau ba área sira hanesan zona indústria, abitasaun no agrikultura nune’e bele dezeña no halo planu dezenvolvimentu iha Baucau.

“Tenke liuhosi planu atu ita hatene Baucau ne’e depois tinan-10 mai oin atu sai oinsá, planu ne’e presiza no nesesáriu,” Bou Lesa informa.

Jornalista    : Natalino Belo

Editor           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here