Simeira internasionál IV Timor-Leste kona-ba enerjia minerál. Imajen/ANPM

DILI, 14 juñu 2022 (TATOLI)—Autoridade Nasionál Petróleu no Minerál (ANPM) hamutuk ho Ministériu Petróleu no Minerál (MPM) no empreza IN-VR oil & gas, tersa ne’e, realiza simeira internasionál IV kona-ba enerjia no minerál.

Prezidente ANPM, Florentino Soares Ferreira, hateten, objetivu simeira ne’e atu kontinua dada investidór no kontinua kria kooperasaun ho nasaun viziñu Indonézia, Austrália, Singapura, inklui país seluk tan.

“Sira entuziasmu tebes atu haree oportunidade iha Timor-Leste. Ita aproveita iha simeira ida ne’e hodi introdús atividade mina no gas ba públiku hosi doméstika no hosi rai-liur, ita promosaun ba petrolíferu nian tanba bloku petrolíferu 18 foin iha empreza lima mak manán ba bloku lima, enkuantu bloku sira seluk seidauk. Ita fiar katak liuhosi simeira ne’e ita bele atrai tan investidór sira seluk,” Prezidente ANPM hateten iha ámbitu simeira, iha salaun City 8, Manleuana.

Ba indústria petrolífera, hahú tinan 2019 halo lansamentu ba bloku 18, kompostu hosi tasi-laran 11 no rai-maran hitu.

“Foin daudaun iha fulan hirak liubá ita fó anúnsiu manán-na’in ba bloku lima, ne’ebé bloku tolu iha rai-maran no bloku rua iha tasi-laran, hosi bloku hirak ne’e hatudu katak ita iha esperansa boot tanba ita sei iha atividade barak iha indústria petrolífera,” nia akresenta. 

Notísia relevante: Empreza lima sai manán-na’in ba lisensiamentu petrolíferu bloku 18

Iniasiativa ne’e hatudu katak Timor-Leste nia ekonomia ba indústria mineira hahú nakloke no ba oin nafatin hakarak hatudu ba mundu katak Timor-Leste iha potensialidade boot. 

“Ohin ita foin dahuluk bolu investidór balun ne’ebé mak iha interese ba Timór nia osan-mean sira hanesan mármeru, manganeza no rikusoin sira seluk ne’ebé durante ne’e Timor-Leste seidauk esplora,” nia relata.

Nune’e, simeira ohin hanesan fó oportunidade ba timor-oan sira atu envolve iha kampu serbisu, tanba ne’e hirak ne’ebé hetan edukasaun presiza hetan kapasitasaun iha atividade petrolífera no mineirál.

“Durante ne’e ita-nia emprezáriu barak mak dependénsia liu ba projetu Governu no agora ita hakarak hadook ita-nia an, emprezáriu sira ne’e bele partisipa mós iha provizaun bens no servisu ba atividade petrolífera no minerál atu nune’e bele neneik hadi’a sira-nia ekonomia,” nia dehan.

Simeira ne’e sei realiza durante loron-tolu, hahú 14 to’o 16 juñu 2022.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here