Jornalista Agência TATOLI.IP, Felicidade Ximenes, halo intervista eskluzivu ho Vise-Ministru Saúde, Bonifácio Maucoli dos Reis. Imajen Tatoli /Egas Cristóvão

DILI, 13 juñu 2022 (TATOLI)— Hahú tinan 2019 too 2022, Minsitériu Saúde konsege konstrui fasilidade saúde iha territóriu nasionál, ne’ebé finansia hosi fundu Orsamentu Jerál Estadu (OJE) no ajuda hosi parseiru internasionál no fundu COVID-19 hamutuk 639.

Hosi totál fasilidade saúde 639, kompostu hosi Sentru Saúde hamutuk 71, postu saúde 325, Maternidade 50, Mini Maternidade hamutuk tolu, mini laboratóriu 12, rezidénsia médiku 156, Izolamentu COVID-19 hamutuk 12 no Laboratóriu COVID-19 hamutuk 10.

Konstrui fasilidade saúde ne’e ho bazeia ba Objetivu Dezenvolvimentu Sustentavel (ODS) 2011 too 2030, ne’ebé VIII Governu Konstitusionál iha komprimisiu dezenvolve programa saúde iha família liuhosi dezenvolve  área  infraestrutura  bázika no rekursu umanu  hodi  presta  servisu di’ak  liután  ba populasaun  liuliu hakbesik  saúde ba komunidade.

Nune’e, Governu kada tinan prioritiza setór saúde liuliu foku ba infraestrutura hosi destaka profisionál saúde ba kada postu saúde sira iha área rurál  bele hafasil komunidade hetan tratamentu saúde.

Atu hatene kle’an kona-bá progresu no dezafiu setór Saúde iha Timor-Leste, Jornalista Agência TATOLI, hala’o intervista eskluzivu ho Vise Ministru Saúde, Bonifacio Maucoli dos Reis, iha nia-Gabinete Palasiu Sinzas, Caicoli, segunda ne’e.

Oinsá politika Nasionál atu hakbesik saúde ba família, hodi mellora atendimentu médiku ida-ne’ebé kualidade ba sidadaun sira?

Atu hakbesik saúde iha familia, Ministériu Saúde kria no implementa ona Politika Nasionál.Saúde iha Familia nu’udar parte hosi Pakote Komprensivu ba Kuidadu Saúde Primáriu ne’ebé koletivu no integradu.

Politika ne’e ho objetivu sira mak hanesan, asegura asesu ba kuidadu primáriu ho kualidade no modelu ekuitativu iha nasaun laran tomak ba alkansa kapasidade rezolutiva ba 80% problema no nesesidade saúde iha familia no komunidade sira.

Asegura kontinuidade, globalidade no integralidade ba prestasaun kuidadu entre nivel oin-oin (primáriu, sekundáriu no tersiariu) iha Sistema Nasional Saúde.

Atu alkansa objetivu sira ne’e profisinál saúde integradu ka servisu iha ekipa katak profisionál saúde sira, Médiku, Enfermeiru, Parteira no Tékniku Aliadu sira sei hala’o atividade kuidadu entegradu ba uma-kain ou familia ho meiu “door to door visit” ne’ebé maka hanaran vizita domisiliária. Vizita ne’e kompostu husi vizita integral no vizita tinan ida dala-ida.

Vizita Rotina ka Regular: depende ba kondisaun saúde ne’ebé identifika durante vizita integrál moras ka defisiénsia ruma no vizita epemiolojika: freku’ensia depende ba akontesimentu surtu ka kazu espesifiku epidemiolojika ruma.

Servisu Integradu Saúde Comunitária ka SISCa

Servisu Integradu Saúde Komunitária(SISCa) nu’udar pakote servisu saúde integradu Komunitária, ne’ebé komunidade nivél suku organiza, mobiliza, no hamutuk ho Sentru Saúde Komunitéria oferese pakote servisu saúde ba populasaun iha aldeia,suku ne’ebé laiha postu saúde ka do’ok ho la’o-ain liu oras ida no fatin aglumeradu ho ema 150 ba leten hanesan (merkadu, prizaun, koléjiu).

Objetivu maka atu lori asisténsia ka kuidadu Saúde ba komunidade nia leet. Asisténsia saúde iha SISCa kontinua aplika sistema ne’ebé hanaran “Sistema Asisténsia Meja lima”. Sistema asisténsia meja lima hanesan sistema asisténsia ne’ebé integradu no sistematiku.

Hanesan, daluhuk  registu; daruak  tetu, sukat as no sukat LILA (husi PSF); datoluk  konsulta inan isin-rua, akonsellamentu ba Planamentu Familiar no imunizasaum, dahaat  promosaun no edukasaun saúde, inklui Ijiéne pesoál no saneamentu hosi PSF no pessoal saúde, dalima asisténsia saúde hosi pesoal saúde.

Progresu saida maka ita konsegue atinje ona husi implementasaun politika nasionál Saúde liu liu liga ba Objetivu Dezenvolvimentu Sustentavel (ODS) ne’ebé liga ba sidadaun hotu tenke asesu saúde ho diak? no dezafiu saida bele esplika? Atu solusiona ida-ne’e oinsá?

Objetivu Dezenvolvimentu Sustentavel nu’udar kompromisu Globál hosi Estadu Membru sira hotu atu alkansa Saúde ida-ne’ebé di’ak ba ema hotu hotu “ no one left behind”  katak la husik ema ida hela iha kotuk” no “health for all katak sande ba ema hotu”.

Sidadaun sira hotu tenke hetan asisténsia ka kuidadu saúde ida-ne’ebé hanesan. Objetivu Dezenvolvimentu Sustentavel iha Meta/Goal 17 (alvu 169 no indikadór 232). Meta sira ne’e iha inter-konesaun.

Iha meta tolu maka espesifikamente ligadu ba saúde: Good Health and Well Being katak asegura Saúde Di’ak no Promove Moris Di’ak ba ema hotu.

Dezafiu sira-ne’ebé ita enfrenta maka:

Kestaun ka problema tranzversál sira ka Cross Cutting Issues: tanba kestaun barak ne’ebé la’ós kabe ba área saúde nian, maibé ligadu ba asuntu sosiál, politika, planeta, infraestrutura, dezenvolvimentu sosiu-ekonómiku.

Limitasaun finanseiru ba implementasaun programa tanba ne’e presiza identifika prioridade bazeia ba kapasidade orsamentu ne’ebé disponivel. Presiza buka apoiu finanseiru hosi parseiru dezenvolvimentu hanesan fundu bilateral no multilateral no seluk tan.

Rekursu Umanus: jestaun no dezenvolvimentu presiza profisionál saúde multiskill atubele implementa programa sira iha tereñu, presiza formasaun kontinua no adekuadu ba profisionál saúde hodi implementa programa sira-ne’ebé traxa ona iha Planu Estratéjiku Nasionál Setór Saúde no Polítika Govemu nian.

Infraestrutura ba saúde no infraestrutura sira seluk ne’ebé indiretamente determinante ba prestasaun kuidadu saúde hanesan dalan ne’ebé la di’ak difikulta profisionál saúde sira bele fó asisténsia lalais, partikularmente iha kazu evakuasaun ba referénsia médika no emerjénsia.

Servisu apoiu seluk hanesan: medikamentu no ekipamentu médiku no seluk tan ne’ebé pertinente tebes hodi aseleira implementasaun ba programa sira ne’ebé define ona iha PENSS no Programa Governu nian.

Pandemia COVID-19 fó impaktu ba implementasaun programa balun iha terreñu tanba pesoál saúde konsentra barak liu ba oinsá atu kombate pandemia ne’e.

Oinsá solusiona problema sira-ne’e?

Presiza iha kooperasaun no kolaborasaun inter-setoriál/inter-ministeriál, parseiru dezenvolvimentu, ajénsia Nasaun Unida, Akadédmiku, Instituisaun Sosiedade Sivil, Parseiru Implementadór iha nivél munisípiu, postu Administrativu, lideransa lokál no komunitaria, Igreja no seluk tan.

Presiza nafatin apoiu finanseiru tékniku hosi parseiru dezenvolvimentu, ajénsia apoia fundu sira liuhosi apoia multilaterál no bilateral ne’ebé to’o ohin loron fó nafatin apoiu iha área saúde no presiza apoiu direta no indireta ba formasaun no dezenvolvimentu rekursu umanu, ekipamentu saúde, asisténsia saúde, reabilitasaun no konstrusaun fasilidade saúde.

“Saúde iha ita nia liman rasik” moto ida-ne’e hatudu katak ita ida idak responsabiliza ba ita-nia saúde no kontribui tuir ida-idak nia kbiit hodi hadi’ak saúde iha família nia laran, komunidade no nasaun.

Haforsa Profisionál Saúde sira liu husi formasaun kontinua no eleva sira-nia kapasidade. Ezemplu maka iha formasaun ba pos-laboral ba Parteira no Enfermeiru iha Universidade Nasionál Timor-Leste (UNTL)

MS kontinua presiza apoia hosi setór kuidadu saúde privadu no naun-lukrativu iha asisténsia saúde hanesan Klínika Bairru-Pité, São Joaquim Maubisse, Klínika São João de Deus Laclubar.

Sujere Dezentralizaun Administrativa no Finanseira no delegasaun kompeténsia ba nivel saúde munisípiu no postu administrativu.

Atu hakbesik saúde ba komunidade, MS mós iha politika atu konstrui postu saúde no rezidensia ba médiku sira, hahú 2019 to’o 2022 ne’e konstrui ona hira?

Fasilidade Saúde ne’ebé konstrui  iha tinan 2019  mai too 2022  ne’ebé finansia  husi fundu  Orsamentu Jeral Estadu (OJE) ajuda husi doadór sira ho fundu COVID-19 hamutuk 639.

Hosi totál fasilidade saúde 639, kompostu hosi Sentru Saúde hamutuk 71, postu saúde 325, Maternidade 50, Mini Maternidade hamutuk tolu, mini laboratóriu 12, rezidénsia médiku 156, Izolamentu COVID-19 hamutuk 12 no Laboratóriu COVID-19 hamutuk 10.

Daudaun ne’e, Ministériu Saúde mós orsamenta ona atu aumenta konstrusaun ba fasilidade saúde hamutuk 100-resin iha territóriu nasionál.

Relasiona ho Tipu Fasilidade saúde ne’ebé iha leten, mak hanesan rejistu patrimóniu infraestrutura iha Ministériu Saúde, atualiza dadus sira tuir ordenamentu ne’ebé estabelese iha Timor Laran tomak ho nia númeru no tipu tuir fasilidade saúde ne’ebé mak iha.

Haree ba kualidade no kuantidade profisionál saúde inklui ekipamentu mediku, bele garante ona implementasaun politika saúde nasionál liga ba kualidade atendimentu? karik seidauk sufisiente esforsu saida maka MS presiza halo?

Maske, Ministériu Saúde enfrenta dezafiu barak, maibé la signifika katak MS labele hala’o nia kna’ar nu’udar instituisaun ne’ebé responsabiliza iha área saúde.

Haree ba kuantidade, kualidade no ekipamentu médiku ne’ebé disponivél Ministériu Saúde garante nafatin implementasaun ba programa saúde sira-ne’ebé traxa ka define ona iha PENSS, Programa VIII Governu liga ba SDG.

Tanba profisionál saúde bainhira hala’o nia kna’ar presiza ekipamentu ka dispozitivu, instrumentu no ferramenta sira depende ba área ka pakote ba prestasaun kuidadu saúde ( nivél primáriu, sekundáriu no tersiáriu).

Atu garante disponibilidade ba ekipamentu sira-ne’e, Ministériu Saúde aleinde aproviziona liuhusi SAMES ho Orsamentu Jerál Estadu nian hetan mós doasaun liuhusi Ajénsia Nasaun Unida, Doadór no parseiru dezenvolvimentu sira.

Atu garante Politika Saúde Nasionál ho susesu ida katak sidadaun hotu moris ho saudavel karik presiza investimentu ida oinsá?

Atu garante Politika Saúde Nasionál ho susesu tenke kaer prinsipiu katak “SAÚDE IHA ITA-NIA LIMAN RASIK”. Nune’e karik haree ba investimentu, esensiál liu mak presiza investe hanesan:  

Dahuluk, presiza investe iha ema ka rekursu umanu tanba ema nu’udar sentru ba dezenvolvimentu. Bainhira iha rekursu umanu ho kualidade di’ak bele garante prestasaun no implementasaun ba kuidadu saúde.

Maibé atu garante tenke iha formasaun adekuadu ho kualidade di’ak (formasaun formál no kontinua) hodi eleva sira-nia kapasidade. Iha parte seluk tenke iha insentivu ka reward ba sira-ne’ebé hala’o kna’ar extroardinariu hasa’e salariu, hasa’e karreira iha progresaun no promosaun, oportunidade ba kontinua estudu, no seluk tan.

Daruak, presiza investe iha área infraestrutura Saúde: presiza nafatin infraestrutura ne’ebé adekuadu katak aumenta nia-númeru ka konstrusaun foun no reabilitasaun, manutensaun rútina eskritériu, Ospitál, Sentru Saúde, Postu Saúde, Klínika Maternidade, Rezidénsia, Laboratóriu nune’e bele garante ba pesoál profisionál saúde bele servisu ho seguru no dignu.

Datoluk, presiza mós investe iha ekipamentu, instrumentu, dispozitivu, ferramenta saúde tanba ho teknolojia avansadu husi tinan ba tinan sempre iha atualizasaun no evolusaun kontinua ba ekipamentu sira.

Ita boot nia-nota durante tinan 20 Timor-Leste nia Restaurasaun Independensia atinjimentu iha setór saúde iha ka lae no esplika?

Nu’udar membru Governu ne’ebé responsabiliza ba área saúde iha optimizmu katak iha progresu durante tinan 20. Indikadór importante ne’ebé bele sukat progresu maka taxa kobertura, taxa morbilidade, mortalidade no indikadór apoiu sira seluk hanesan aumenta iha infraestrutura saúde (Hospitál , Sentru Saúde, Postu Saúde, Klínika Maternidade, Laboratóriu, Rezidénsia médika), Rekursu Umanu (númeru profisionál saúde  sira aumenta). Indikadór Saúde sira mak hanesan:

Kobertura ba programa sira aumenta no ba prestasaun kuidadu Saúde, Ministériu Saúde konsege redús ona taxa fertilidade totál husi 5.7 iha tinan  2010, ba 4.2/feto idade reprodutiva, taxa mortalidade ba Inan ka Maternál Mortality Ratio hosi 557 mate/100,000 nascidos vivos iha 2010  ba  195 mate/100,000 Nascidos vivos iha 2016, taxa mortalidade ba labarik (Mortalidade infantil mak husi 45 mate/1000 nascidos vivos iha 2010 iha 30 mate/ 1000 nascidos vivos iha 2016), Labarik menus husi tinan lima mate maka 64 mate/ 1000 nascidos vivos iha 2010 ha 41 mate/ 1000 Nascidos vivos iha 2016.

Tuir dadus hosi peskiza ba ai-han no nutrisaun tinan 2020 hatudu katak Timor-Leste nu’udar nasaun ne’ebé rejista númeru  kazu má-nutrisaun aas ho prevalénsia husi raes badak maka 47.1%.

Hosi persentajen ida-ne’e: 30.2% maka raes badak moderadu, 16.9% maka raes badak grave. Prevalénsia hosi isin-krekas maka 8.6% ho 7.1% maka krekas-maran moderadu no 1.5% mak grave. Prevalénsia todan menus maka 32.1% ho 24.6% mak todan menus moderadu no 7.5% mak todan-menus grave.

Kona-ba moras Malária, dezde tinan-hirak ikus Timor-Leste hatudu progresu iha dezempeñu hodi hatudu taxa insidénsia 0/1000 populasaun. Nune’e ita presiza mantein nafatin hodi nune’e ita bele alkansa faze eliminasaun.

Problema Tuberkuloza sai nafatin problema saúde públika ba Timor-Leste, maske ita hasa’e taxa susesu iha tratramentu no taxa detesaun kazu Tuberkuloze. Relasiona ho moras Lepra, kazu komesa aumenta fali ona iha Munisípiu balun.

Dadus hatudu katak taxa insidénsia moras Tuberkuloze ba Timor-Leste, mak 498/popu1asaun 100.000 no taxa mate maka 100 kada populasaun 100.000. Númeru ida ne’e konsidera aas liu iha Rejiaun Sudeste Aziátiku. Ne’e signifika katak kada loron ema na’in-tolu ka haat maka mate tanba Tuberkuloze iha Timor-Leste. Peskiza mós hatudu katak kauze tinan barak nia laran besik 30-40% maka la konsege deteta no sei kontinua hada’et iha komunidade tanba multifatorial, multideterminante no kestaun transversál.

Relasiona ho Saúde Ambientál, Ijiéne no Saneamentu, Ministériu Saúde deklara ona Área La Soe Fo’er Arbiru (ALFA) iha Munisípiu sira hotu no implementasaun PAKSI (Planu Asaun Komunidade ba Saneamentu no Ijiene), maibé kobertura ba utilizasaun sentina sei ki’ik.

Dadus tinan 2019 hatudu katak implementasaun programa ALFA iha Timor-Leste atinje ona 58%. Ne’e hatudu ona progresu, maibé presiza esforsu maka’as nafatin atu kompleta 42%.

Importante liu hotu maka ita-nia kompromisiu konstante no kontinua ba atividade sira hotu ne’ebé ita deklara ona partikularmente iha área rural no fatin balun iha sentina, maibé la garantia nia ijiéne, saneamentu no kualidade.

Tanba Ministériu Saúde servisu hamutuk ho Ministériu relevante no ajénsia nasaun unidade, esforsu nafatin atu hasa’e kobertura ba “Área La Soe Fo’er Arbiru” no Suku ijiéniku ho Sintina melloradu iha Munisípiu too aldeia, komunidade no uma-kain. Tanba COVID-l9 fó impaktu ba Programa implementasaun ALFA.

Jornalista: Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here