Prezidente Repúblika, José Ramos Horta. Imajen Tatoli/António Daciparu

DILI, 13 juñu 2022 (TATOLI)—Prezidente Repúblika (PR), José Ramos Horta, segunda ne’e, promulga lei kona-ba Planu Opsaun Boot sira ba tinan 2023.

“Ohin, ha’u promulga lei kona-ba Planu Opsaun Boot sira ba tinan 2023. Lei ida-ne’e nu’udar planu indikativu ba prioridade sira Governu atuál nian no orsamentu respetivu ba projesaun sira hanesan ne’e, ne’ebé aplikasaun ba lei ne’e sei hahú iha tinan 2023. Ne’e signifika katak sei laiha impaktu imediatu ba estabilidade finanseira atuál ba rai-laran,” Xefe Estadu ne’e hateten liuhosi komunikadu imorensa ne’ebé Agência Tatoli asesu, segunda ne’e.  

Governu deklara iha lei ne’e katak Planu ne’e iha objetivu atu alkansa objetivu sira-ne’ebé estabelese iha Planu Estratéjiku ba Dezenvolvimentu Nasionál tinan 2011-2030 no depende ba prioridade sira ba Governu ruma iha futuru, planu ida-ne’e bele hetan alterasaun iha kualker tempu atu refleta prioridade sira-ne’ebé hanesan ne’e.

Haktuir iha lei ida-ne’e, Governu nia funsaun mak atu estabelese polítika no Prezidente Repúblika bele fó konsellu ba Governu no hato’o opiniaun sira, públiku ka privadu, kona-ba polítika saida de’it iha domíniu públiku, maibé Parlamentu no Governu nia knar mak atu dezenvolve no implementa polítika públika sira iha ita-nia sistema demokrátika.

Prezidente iha knar atu atua nu’udar mahein ida ba Konstituisaun, nu’udar protetór ba demokrásia no mós ba Estadu Direitu, no atu asegura tuir limitasaun sira lei nian, respeitu no kumprimentu ba regra konstitusionál sira.

“Bainhira promulga lei ida-ne’e ha’u hakarak fó-hatene momoos katak, iha aspektu balu hosi Governu nia planu ne’ebé ha’u sente ladún konfortável. Hosi orsamentu planeadu totál ho montante $3,155,715.306 ba tinan 2023, $1,000,000.000 aloka tiha ona ba estabelesimentu Fundu Veteranu Nasionál. Ha’u ta’uk katak alokasaun ba fundu ida-ne’e la ekuitavel ka proporsionál. Talvés esplikasaun ida ne’ebé detalladu liután kona-ba estratejia ba aplikasaun Fundu ida-ne’e bele halo ita-nia sosiedade no ha’u rasik laran hakmatek,” nia dehan.

Laiha dúvida katak veteranu sira hato’o ona servisu makaas no ho sira-nia sakrifísiu mak Timor-Leste manan ukun rasik an, maibé ida-ne’e la signifika katak alokasaun orsamentu ba sira iha Orsamentu Retifikativu foin lalais ne’e apropriadu atu realiza saída mak Governu hakarak atu halo hodi hamenus nivel moris-ki’ak ne’ebé iha Timor-Leste.

Tuir Horta, fó 90% hosi Orsamentu Retifikativu totál atu ajuda 1,75% hosi populasaun tomak parese tuir PR nia haree hanesan la justu no la ekuitavel, nune’e mós buat ne’e parese la adaptada atu realiza objetivu ne’ebé deklaradu atu ajuda membru populasaun sira-ne’ebé afetadu tiha ona, no loro-loron afetadu ho makaas liuhotu hosi efeitu sira dezastre naturál nian no situasaun ekonomia globál atuál.

“Ha’u fiar katak alokasaun ne’e ninia foku loloos tenke buka atu ajuda ema sira-ne’e, no la’ós ba grupu sidadaun espesífiku ki’ik ida, la haree ba sira-nia importánsia istórika. Ha’u fiar katak tanba sira-nia patriotizmu no knaar sira-nian istorikamente iha luta ba ita-nia ukun an no ba Timor-Leste ida-ne’ebé livre no dezenvolvidu, sira sei komprende preokuasaun hirak-ne’e. Liu-liu tanba buat ne’ebé importante liu hotu, aleinde asuntu igualdade sosiál, mak sustentabilidade ekonómiku no finanseiru ba rai ida-ne’e, ne’ebé sira-hotu hadomi no luta atu liberta,” nia hateten.

Tanba razaun hirak-ne’e, PR iha intensaun atu husu Tribunál Rekursu atu revee lei kona-ba Orsamentu Retifikativu. Buat ida-ne’e nu’udar parte ida hosi prosesu demokrátiku atu asegura funsionamentu normál no saudável ba nasaun nia instituisaun sira.

Kestiona lei sira-ne’ebé hamosu dúvida, husu konsiderasaun tuir dalan imparsiál, liuhosi juiz sira iha Tribunál Rekursu, sai hanesan dalan ida tuir nia kompeténsia sira, ne’ebé fó fatin ba Prezidente atu hala’o nia funsaun nu’udar garantiadór ba legalidade konstitusionál, no Tribunál Rekursu iha kompeténsia eskluziva atu desidi kona-ba konstitusionalidade lei sira-nian.

Se tuir nia avaliasaun, Tribunál Rekursu konsidera katak iha irregularidade konstitusionál sira relasiona ho alokasaun fundu hirak-ne’e, akordaun ne’e sei nesesariamente ezije emenda ba Planu Opsaun Boot sira ba tinan 2023, no nune’e PR laiha objesaun ba nia promulgasaun.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here