Jogadór sobo-ai uza farda kór metan-mutin tenta hadau bola hosi jogadór Ex Kodim. Imajen Tatoli/Sérgio da Cruz.

BOBONARO, 13 juñu 2022 (TATOLI) – Kompetisaun jogu futeból sub-23 époka 2022 faze kuarta finál ne’ebé realiza iha kampu futeból Maliana segunda ne’e, ekipa Sobo-ai hosi suku Oe-leu, postu administratrivu Bobonaro, susesu hakat ba finál hafoin halakon ekipa Ex Kodim liuhosi golu únika Juvito Viçente Soares ho númeru kamizola (23).

Iha menutu dahuluk, ekipa rua lansa kedas kontra no atake tuir tékniku no tátika hosi treinadór idak-idak, nune’e jogu iha menutu lima, ekipa Sobo-ai loke kedas bola-ain ba-ain halo bola barullu iha oin, maibé tama ladi’ak tanba defeza Ex Kodim metin.

Jogu kontinua la’o iha menutu 10, ekipa Sobo-ai hosi suku foho ne’e domina bola barak-liu hodi lansa ameasa beibeik iha liña oin liuhosi avansadu prinsipál Artur Soares (10) maibé bola barak la kona alvu no balu guarda rede konsege salva.

Ho dominasaun bola ne’e halo ekipa Sobo-ai sólidu liután no fiar-aan soe bola bola barak ba oin ho  intensaun  fó oportunidade ba Artur Soares (10) atu prodús golu ruma, maibé la konsege tanba defeza Ex Kodim la mamar.

Jogu kontinua manas liután, defeza Ex Kodim halo fallansu iha ninia área rasik tanba trauma ho Sobo-ai atu hadau hosi sira-nia ain, nune’e árbitru deside fó oportunidade ba Sobo-ai hola bola-kantu.

Enkuantu oportunidade osan-mean ne’e aproveita kedas hosi jogadór Juvito Vicente Soares (23) hiit bola kantu tama kedas ba zona ameasa nia laran no mai gurada rede konsege baku maibé la konsege salva tanba bola tama liu tiha ba rede laran, nune’e jogadór refere susesu fura uluk gaurda-rede adversáriu hodi muda rezultadu ba 1-0. Rezultadu ne’e termina iha primeira parte.

Tama ba segunda parte, ekipa Ex Kodim mai ho enérjia forte hodi lansa ameasa ba rede Sobo-ai tanba lakoi hamonu dignidade ho rezultadu derrota, ekipa hosi suku Ritabou ne’e domina bola barak hodi lansa ameasa tuituir malu iha menutu 50 ba leten, maibé Sobo-ai nonok mantein de’it ho jogu defensivu tanba lidera provizóriu.

Jogu kontinua la’o, ekipa Ex Kodim aumenta tán sira-nia ritmu jogu ho modelu ofensiva, hakarak muda rezultadu empata, maibé fillera kotuk ekipa Sobo-ai metin hanesan ‘fatuk-mutin’ ne’ebé bok la ba, ikus mai ameasa hirak-ne’e hela de’it ho ameasa, to’o termina segunda parte.

Maske Ex Kodim lakon maibé sei iha opurtunidade kompete iha jogu tuir nune’e hadau malu terseira lugár.

Treinadór Sobo-ai, Vitorino Gusmão, sente orgulu ho esforsu ne’ebé nia ekipa hatudu iha kampu, maski preparasaun fíziku durante ne’e ladún másimu maibé konsege hatudu rezultadu di’ak.

“Ami garante loron hirak-ne’e sei halo preparasaun di’ak liután, nune’e iha finál mai ne’e bele kompete ho forsa ne’e metin hasoru ami-nia adversáriu,” nia espresa.

Jogu ne’e lira hosi árbitru Lucas Feliz, asistente primeiru Peregrinho dos Reis, asistente segundu Longuinhos  ‘Gepeng’ no árbitru suplente Domingos Vicente ‘Juragan’.

Tuir oráriu hosi Asosiasaun Futeból Bobonaro, aban tuku 04:00 lokraik, klubu River Bulobu sei kontra Madiran hodi hadau malu tama finál hasoru Sobo-ai, no ida-ne’ebé  lakon sei hasoru Ex Kodim, hodi hadau malu terseiru lugár.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here