Estádiu Munisipál Dili. Imajen/espesial

DILI, 13 juñu 2022 (TATOLI)— Governu liuhosi Ministériu Justisa no Sekretáriu Estadu Desportu no  Juventude, segunda ne’e, deside atribui  Estádiu Munisipál Dili ba Federasaun Futeból Timor-Leste, ne’ebé tuir planu Federation International Football Association (FIFA) liuhosi ninian reprezentante iha Timor-Leste, sei halo kontratu ho Governu Timor-Leste  hodi dezenvolve Estádiu Munisipál Dili.

“Governu atribui ona Estádiu Dili ba FFTL hodi entrega ba FIFA atu halo konstrusaun uza sira nia orsamentu, ne’ebé ami halo ona kontratu arrendamentu ho FFTL ne’ebé hetan apoiu hosi FIFA, kontratu arrendamentu ne’e ba tinan 45, maibé hotu sei kontinua tan  ba tinan 45 ne’ebé bele too tinan 90 no sei selu arrendamentu ne’e bá Estadu,” Ministru Justisa Tiago hateten ba Jornalista-sira iha nia knaar fatin Dili.

Kona-ba presu arrendamentu ba Estádiu Munisípal Dili ne’ebé planu sei konstrui husi FIFA, arrendamentu Estadiu Munisípal Dili entre Governu Timor-Leste ho FFTL, sei hein prosesu levantamentu hosi ekipa téknika Diresaun Jerál Terras no Propriedade nian. Hafoin ne’e Ministru Justisa sei deside no fó presu ba arrendamentu, bazeia relatóriu levantamentu terreñu husi Estádiu Munisipál Dili, no konstrusaun 100% responsavel hosi FIFA nian.

Kampu boot Estádiu Munisípal Dili ne’e FIFA mak Dezenvolve 100% ho orsamentu sira nian tanba ne’e governu liuhosi Ministériu Justisa halo kontratu arrendementu ho FFTL.

“FIFA mós sei responsavel buat hotu-hotu sira hakarak halo kampu iha munisípiu 13 inklui munisípiu Ataúro, tanba ne’e ita agradese tebes no governu apoia nafatin atu koopera ho FFTL hodi halo arrendamentu ba kampu ne’ebé sira presiza atubele dezenvolve futeból iha Timor-Leste no bele besik jogu internasionál sira mai iha Timor-Leste,” Governante ne’e agradese.

Iha fatin hanesan,  Prezidente FFTL, Francisco Martins da Costa Pereira Jerónimo, afirma, loloos ne’e estádiu harii tiha ona no agora dokumentu loos ona sira bá to’o iha ne’ebá la hein kle’ur tan sira submete dokumentu ba FIFA hodi halo konkursu públiku ba kompañia sira ne’ebé mak atu konstrui estádiu refere.

“Ha’u mak husu duni ba FIFA atuhalo konkursu internasional hodi haree kompania ne’ebe mak iha esperiensia halo ona estadiu,” Prezidente FFTL hatutan.

Entretantu, Regional Office Development Manager FIFA , Lavin Vigneh J, ne’ebe partisipa mós iha reuniaun refere informa katak, sira hakarak lori fila futeból internasional mai Timor-Leste.

“Ami hakarak lori fila futeból mai Timor-Leste no ita hatene Timor-Leste halo komptetisaun internasionál ikusliu iha Timor, iha tinan 2015 no bainhira ekipa nasionál hakarak joga sira tenke ba liur, nune’e ami hakarak lori fila futeból mai Timor-Leste,” nia kompromete.

FIFA ho FFTL sei moderniza Estádiu ne’e sai padraun internasionál iha Timor-Leste. Nune’e, bele iha ona oportunidade atu jogu internasionál sira hanesan AFC Cup, AFF no Suzuki bele halo ona iha Timor-Leste no hosi atividade sira ne’e bele arrola reseita ekonómia ba Estadu.

Prosesu reabilitasaun Estádiu Munisipál Dili

Iha 2015 ba liubá, Sekretáriu Estadu Juventude no Desportu (SEJD), Leovigildo Hornay iha VI Governu Konstitusionál loke tenderizasaun no kompañia Marino Interprise mak hetan oportunidade hodi halo reabilitasaun ba Estádiu ne’e ho valor orsamentu millaun $1.5, maibé la konsege finaliza.

Iha fali VII Governu Konstitusionál ne’ebé lidera hosi Primeiru-Ministru Marí Alkatiri no Sekretáriu Estadu Juventude no Desportu (SEJD), Osorio Florindo, durante fulan sia (9) maibé la konsege rezolve.

Iha VIII Governu Konstitusionál lideradu hosi Primeiru-Ministru Taur Matan Ruak no SEJD Nelio Isaac Sarmento, hapara tiha servisu kompañia Marino Interprise no la konsege rezolve buat ida iha prosesu halo reabilitasaun ba estádiu Dili ne’e.

VIII Governu ho Primeiru-Ministru no SEJD troka fali ho Abrão Saldanha hahú atu dezenvolve fali, maibé ninia prosesu iha hela KAFI no ADN nia liman.

Notísia relevante:  PM Taur konkorda entrega Estádiu Dili ba FFTL

Jornalista: Hortencio Sanchez

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here