Vise-Ministru Saúde, Bonifacio Maucoli dos Reis, hasai foto hamutuk ho kovidadu sira hafoin inaugura sentru amigavel saúde ba joven adolessente. Imajen/mídia MS

DILI, 10 juñu 2022 (TATOLI)— Ministériu Saúde (MS), inaugura sentru amigavél saúde ba joven adolexente hodi fó informasaun no atendimentu médiku ba juventude sira iha ho kualidade no prevene kaben sedu no isin-rua sedu, iha iha suku Mulo, postu administrativu Hatubelico, munisípiu Ainaro.

“Sentru ne’e harii ho objetivu atu ema adolexente no joven sira bele asesu informasaun no atendementu saúde ne’ebé apropriadu no kualidade,”Vise-Ministru Saúde, Bonifacio Maucoli dos Reis, hateten liuhosi nota ne’ebé Agência TATOLI asesu, sesta ne’e.

Joven adolexente sira iha Timor-Leste importante tebes iha kontextu dezenvolvimentu nasaun, nune’e tenke fó informasaun no atendimentu saúde ba joven sira atu labele enfrenta problema sira hanesan kaben sedu ka isin-rua sedu, má nutrisaun, anemia, tuberkuloze, moras hada’et liuhusi relasaun sexuál hanesan HIV-SIDA, moras mentál, no moras sira seluk tanba sei hamosu problema sosiál, ekonómia no politika.

“Problema hirak-ne’e sai hanesan preokupasaun liuliu Ministériu Saúde ne’ebé responsabiliza direta hodi fó prestasaun kuidadu saúde ba adolessente no joven sira, atu nune’e bele prevene sira labele hetan problema saúde,” nia afirma.

VIII Governu Konstitusionál RDTL, hakarak espressa sentidu no profundu gratidaun ba sidadaun hotu no parseiru nasionál no internasionál nia-apoiu nu’udar sentidu solidariedade atu haforsa, hametin no mellora Sistema Nasionál Saúde ho objetivu atu hadi’ak komunidade Timor-Leste nia saúde no moris di’ak iha nível nasionál, munisipál, postu adminstrativu, suku no aldeia.

Liuhusi dadus Peskiza Demografíku no Saúde, tinan 2016 hatudu katak adolexente entre idade 10 too19 iha Timor-Leste 23% mak husi totál populasaun no joven entre idade 15 too 24 hamutuk 32%.

Taxa fertilidade ba adolexente idade  tinan 15 too 19 maka 42/1,000 feto idade 15 too 19 ho diferensa entre área urbana no rurál respetivamente 19/1,000 feto idade 15 to’o 19 no 55/1,000 feto idade 15 too 19.

Taxa fertilidade ba joven idade entre idade 20 too 24 maka 188/1,000, feto idade 20 too 24 (urbana 132 no rurál 222). 5% hosi feto idade tinan 15 too 19 maka sai ona inan, loloos sira sei iha oportunidade atu dezenvolve an iha aspetu vivénsia hanesan eskola, karreira no oportunidade.

Tanba haree ba taxa rua ne’e, hatudu katak adolexente no joven Feto iha área rurál iha taxa fertilidade aas liu kompara ho sira-ne’ebé hela iha área urbana.

Fatór sira-ne’ebé influénsia ba fertilidade aas maka hanesan koñesimentu ba saúde reprodutiva, seksual, asesu no oportunidade ba eskola limitadu, laiha abilidade ka skill ba área empregu ruma, nível edukasaun, kondisaun sosio-ekonómiku uma laran, konseitu tradisionalizmu no kultura no influensia hosi teknolojia.

Nune’e, hahú kedas iha tinan 2007, joven adolexente hanesan unidade iha momentu ne’eba, servisu hamutuk ho liña ministériál ho parseiru hodi hala’o advokasia nasionál no nível munisipál hodi promove hahalok saudável liuhusi informasaun no edukasaun kona-ba saúde reprodutiva ba ema adolssente no joven sira.

Ministériu Saúde liuhusi Departamentu Saúde Adolessente no Joven hamutuk ho parte interesadu sira hotu nafatin realiza atividade implementasaun oioin ba adolexenteno joven sira.

Estabelesimentu Sentru Amigável Saúde Adolexente no Joven, Ministériu Saúde mós servisu hamutuk ho liña ministeriál sira, autoridade munisípiu, parseiru Plan International Timor-Leste, sosiedade sivíl (Fada, Talata, Nafofila) hodi estabelese ona sentru amigável ba adolessente no joven iha munisípiu tolu mak hanesan Dili, Aileu no Ainaro. Servisu hamutuk ho ministériu edukasaun hodi enkaixa matéria saúde reprodutiva iha kurríkulu nasionál.

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here