Prezidente Repúblika, Ramos Horta .Imajen Tatoli/Antonio Daciparu

DILI, 09 maiu 2022 (TATOLI)—Prezidente Repúblika, José Ramos Horta, husu ba Governu, Parlamentu Nasionál no kontribuisaun hosi parseiru dezenvolvimentu internasionál sira atu servisu makaas kombate má nutrisaun iha rai-laran no hadi’a kualidade edukasaun hodi fornese asesu ba labarik hotu iha Timor-Leste.

Notísia Relevante: Labarik TL 47% má nutrisaun krónika

“Ha’u-nia apelu ba Governu, Parlamentu no parseiru dezenvolvimentu mai ita servisu hamutuk hotu-hotu sein exesaun, Governu no opozisaun, lidér igreja katólika no relijiaun sira seluk, setór privadu, sosiedade sívil, xefe suku, atu iha Timor-Leste ida-ne’ebé laiha tan bebé mate bainhira moris, no ida-ne’ebé labarik hotu-hotu saudável, nutrisaun di’ak, aprende no seguru no fornese asesu ba edukasaun pre-eskolar ba labarik hotu-hotu,” Xefe Estadu ne’e hateten iha nia diskursu iha reuniaun anuál entre Governu no Parseiru Dezenvolvimentu (TLDPM, siglá inglés), iha Ministéiru Finansa, Aitarak Laran, sesta ne’e.

Atu atinje vizaun ida-ne’e, Xefe Estadu rekomenda ba Governu no parseiru dezenvolvimentu sira atu iha alvu ne’ebé konsentradu ba prioridade rua.

Prioridade dahuluk atu redús má nutrisaun ba labarik, liu-liu iha loron 1000 dahuluk entre konsepsaun (bebé iha knotak) to’o bebé sira halo tinan daruak.

“Ita hotu tenke hatene katak, hafoin labarik halo ona tinan rua, kuaze imposivel atu reverte efeitu má nutrisaun. Fó susu-been inan nian ba bebé diminui alarmante no ida-ne’e tanba ignoránsia no promosaun susu-been formula ne’ebé laiha morál,” nia dehan.

Nune’e, husu ba Governu atu urjentemente adota kódigu OMS susu-been inan nian ne’ebé kle’ur ona iha Ministériu Saúde to’o kuaze dékada ida, kombinasaun hosi pobreza, ignoránsia no promosaun komersiál susu-been formula artifisiál hola papél krítiku ba prevalénsia raes-badak ne’ebé akontese ba labarik sira.

Ba prioridade daruak mak atu fornese asesu ba edukasaun pre-eskolár ba labarik hotu-hotu atu harii baze ne’ebé forte ba labarik sira atu nune’e sira bele atinje sira-nia dezenvovlimentu pontensiáll tomak, labele para eskola no ramata sira-nia estudu.

Nia dehan, tansá mak hili área rua ne’e hanesan prioridade prezidensiál ne’ebé prinsipál, tanba  dahuluk kuaze metade labarik timor-oan sira má nutrisaun no tan ne’e sira iha posiblidade ba risku atu mate dala haat.

Labarik sira-nia dezenvolvimentu kakutak la-di’ak no sira iha risku atu moras hela de’it, tanba sira-nia imunidade fraku, sira iha posiblidade atu la kompleta sira-nia edukasaun, tanba sira-nia Intellectual Quotient (IQ) no abilidade kognitivu menus no sira iha posiblidade liu atu hetan rendimentu ki’ik.

“Ida-ne’e signifika katak se ita la halo buat ruma agora posiblidade metade hosi ita-nia futuru jerasaun sei lakon leet de’it. Ita sei laiha kapitál umanu ne’ebé prresiza atu dezenvolve nasaun ida-ne’e, atu halo serbisu, atu hahú negósiu, no atu kontribui ba dezenvolvimentu ekonomia iha Timor-Leste,” nia hateten.

Horta hatutan, nia prioridade daruak mak atu asegura katak labarik tinan tolu to’o lima inskreve iha pre-eskolar, ida-ne’e importante tanba iha tinan lima dahuluk, koneksaun neutral liu millaun ida mak forma kada segundus-ritmu ida-ne’ebé nunka bele repete fali iha moris ne’e.

Labarik ninia kualidade esperiénsia dahuluk halo diferésia ne’ebé krítiku bainhira sira-nia kakutak dezenvolve, bele fornese baze ne’ebé forte ka fraku ba aprendizajen no komportamentu iha sira-nia moris tomak.

Dadaun ne’e, labarik timor-oan 75% sira la atende pre-eskolar, labarik tinan lima mai kraik 56% ninia saúde, aprendizajen no bem-estar psikososial la la’o ho di’ak.

“Ita la presiza atu ba do’ok hodi hatene ezemplu husi nasaun susesu sira, ne’ebé investe iha saúde no edukasaun ba labarik sira no agora aproveita retornu ba sira-nia investimentu,” nia hateten.

Ezemplu, Korea do Súl atinjr susesu ne’ebé notavel iha kombinasaun entre kresimentu ekonomia ne’ebé lalais no redusaun pobreza ne’ebé signifikante tanba atinjimentu nasaun nian ne’e impresionante tebes, bainhira ema konsidera katak menus hosi 25% hosi sira-nia rai mak uza ba agrikultura ka atividade ekonomia seluk no Korea do Sul iha rekursu naturál ne’ebé limitadu tebes.

Hanesan mós ho Timor-Leste, Korea do Sul iha esperiénsia funu sívil ne’ebé estraga maiória infraestrutura, atinjimentu prinsipál ida hosi Governu Korea iha 1950 mak eradikasaun analfabetizmu liuousi ekspansaun instituisaun edukasaun ho lalais.

Tan ne’e, nu’udar konklusaun permite rekomenda pasu prátiku rua atu reverte situasaun terrivel labarik timor-oan sira-nian no atinje nia vizaun.

“Ida, Governu tenke aloka orsamentu liután atu kombate má nutrisaun ba labarik sira iha setór nutrisaun tomak. Ha’u kongratula Primeiru-Ministru ne’ebé foin lalais lansa ona Planu Estratéjiku Nasionál Setór Saúde ba 2022-2026. Agora Gabinete Primeiru-Ministru no Ministeiru Saúde tenke asegura katak iha alokasaun orsamentu ba implementasaun Planu Estratéjiku ida-ne’e,” nia dehan.

Nia mós rekomenda ba Ministériu Saúde atu konsidera hodi estabrlese Dirasaun Nasionál Nutrisaun iha ministéiru atu progresa ajenda nutrisaun ba nivel ne’ebé loos, no nia-parte mós nomea tiha ona asesór ba nutrisaun no seguransa ai-han atu apoiu objetivu ida-ne’e.

Daruak, suku ida-idak tenke iha pre-eskolar tanba ajénsia ONU ho susesu halo projetu pilotu ona modelu ne’ebé kustu efetivu hanesan pre-eskolar komunitária. Ministériu Edukasaun tenke atinje matríkula 100% ba labarik sira iha pre-eskolár iha nasaun tomak.

Nune’e, permite PR uza oportunidade ida-ne’e atu fahe mós katak pasu dahuluk ba asaun ida-ne’e mak PR sei lansa modelu pre-eskolár iha Palásiu Prezidensiál.

“Ha’u mós husu ona ba ha’u-nia ekipa atu estabelese Grupu Dezenvolvimentu Infánsia nian, ne’ebé sei lidera hosi Gabinete Prezidente, ida-ne’ebé sei envolve liña ministeriál hotu-hotu, parseiru dezenvolvimentu no organizasaun sosiedade sívil,” nia hateten.

Prezidente Repúblika fiar katak parseiru dezenvolvimentu hotu-hotu mak prezensa iha reuniaun, no Governu Timor-Leste ne’ebé sei apoiu nia vizaun.

“Sei apoiu ha’u-nia vizaun atu iha Timor-Leste ida-ne’ebé laiha tan bebé mate bainhira moris, no ida-ne’ebé labarik hotu-hotu saudável, nutrisaun di’ak, aprende no seguru. Ha’u promote katak ha’u sei halo buat hotu ho poder no kapasidade ne’ebé ha’u iha hodi apoia imi iha esfrosu ida-ne’e,” nia dehan.

Jornalista  : Nelson de Sousa

Editór         : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here